കൊവിഡ് പരിശോധനയില്‍ ആള്‍മാറാട്ടം നടത്തിയ സംഭവത്തില്‍ കെഎസ്‌യു സംസ്ഥാന പ്രസിഡന്റ് കെഎം അഭിജിത്തിനെതിരെ കേസ്. ആള്‍മാറാട്ടം, പകര്‍ച്ചവ്യാധി നിയമം എന്നിവ പ്രകാരമാണ് കേസ്. അഭിജിത്ത് പേരും വിലാസവും തെറ്റിച്ച് നല്‍കിയെന്ന് പൊലീസ് കണ്ടെത്തി. പോത്തന്‍കോട് പഞ്ചായത്ത് പ്രസിഡന്റ് കെ വേണുഗോപാലന്‍ നായര്‍ പൊലീസില്‍ പരാതി നല്‍കിയിരുന്നു.
അഭിയെന്ന പേരിലാണ് കെഎം അഭിജിത്ത് പരിശോധന നടത്തിയത്. വ്യാജ വിലാസമാണ് നല്‍കിയത്. കൊവിഡ് സ്ഥിരീകരിച്ച ആളെ കണ്ടെത്താനാകാത്തത് ആശയക്കുഴപ്പത്തിന് ഇടയാക്കിയിരുന്നു.
പോത്തന്‍കോട് പഞ്ചായത്തില്‍ 19 പേര്‍ക്കാണ് കഴിഞ്ഞ ദിവസം കൊവിഡ് സ്ഥിരീകരിച്ചത്. കെ എം അബി, തിരുവോണം എന്ന വിലാസത്തിലായിരുന്നു അഭിജിത്ത് പരിശോധന നടത്തിയത്. കെ എസ് യു സംസ്ഥാന സെക്രട്ടറി ബാഹുല്‍ കൃഷ്ണയുടെ വിലാസമാണ് പരിശോധനയ്ക്കായി നല്‍കിയിരുന്നത്.
