'സ്ത്രീ നവോത്ഥാനത്തിന്റെ നാമ്പുകള്‍' എന്ന വിഷയത്തില്‍ സെമിനാര്‍ നടത്താന്‍ എം.എസ്.എഫ് ഹരിത. മുന്‍ കേരളമുഖ്യമന്ത്രിയും മുസ്‌ലിം ലീഗ് നേതാവുമായിരുന്ന സി.എച്ച് മുഹമ്മദ് കോയയുടെ ചരമദിനാചരണത്തിന്റെ ഭാഗമായാണ് സെമിനാര്‍ നടത്തുന്നത്.
സെപ്തംബര്‍ 28ന് കോഴിക്കോട് വെച്ചായിരിക്കും സെമിനാര്‍ നടത്തുന്നത്.
എം.എസ്.എഫ് കേരള സ്റ്റേറ്റ് കമ്മിറ്റി ഫേസ്ബുക്ക് വഴിയാണ് പരിപാടിയെക്കുറിച്ച് പുറത്ത് വിട്ടത്. ഹരിതയുടെ പുതിയ കമ്മിറ്റി നിലവില്‍ വന്ന ശേഷം നടക്കുന്ന ആദ്യത്തെ പ്രധാനപരിപാടിയാണിത്.
എം.എസ്.എഫ് പ്രസിഡന്റ് പി.കെ നവാസിനെതിരെ ഹരിതയിലെ മുന്‍ ഭാരവാഹികള്‍ രംഗത്തെത്തുകയും ലൈംഗികാധിക്ഷേപം നടത്തിയെന്ന് പരാതി നല്‍കുകയും ചെയ്തിരുന്നു. മുസ്‌ലിം ലീഗ് നേതൃത്വം അടക്കം പരാതി പിന്‍വലിക്കണമെന്ന് അറിയിച്ചെങ്കിലും ഹരിതയിലെ പെണ്‍കുട്ടികള്‍ പരാതിയില്‍ ഉറച്ചുനില്‍ക്കുകയായിരുന്നു.