മോഹന്‍ലാല്‍ ഫാന്‍സ് അസോസിയേഷന്‍ രണ്ടായി; തടസമായി വന്നാല്‍ പ്രതികരിക്കുമെന്ന് ‘യൂണിവേഴ്‌സല്‍ റിയല്‍ ഫാന്‍സ്’
നടന്‍ മോഹന്‍ലാലിന്റെ പേരിലുള്ള ആരാധക സംഘടനയില്‍ പൊട്ടിത്തെറിയും പിളര്‍പ്പും. മോഹന്‍ലാലിന്റെ പിന്തുണയോടെ പ്രവര്‍ത്തിക്കുന്ന ഓള്‍കേരളമോഹന്‍ലാല്‍ ഫാന്‍സ് കള്‍ച്ചറല്‍ ആന്റ് വെല്‍ഫെയര്‍ അസോസിയേഷനില്‍ (എകെഎംഎഫ്‌സിഡബ്ലിയുഎ) നിന്ന് പുറത്തുവന്നവരും സംഘടനയുടെ നേതൃത്വത്തിലുള്ള ചിലരുമായി രൂക്ഷമായ വാക്‌പോര് നടക്കുകയാണ്. തങ്ങളുടെ സംഘടനയെ എകെഎംഎഫ്‌സിഡബ്ലിയുഎ അധിക്ഷേപിക്കുകയാണെന്ന് യൂണിവേഴ്‌സല്‍ റിയല്‍ മോഹന്‍ലാല്‍ ഫാന്‍സ് വെല്‍ഫെയര്‍ ഓര്‍ഗനൈസേഷന്‍ ആരോപിച്ചു. മോഹന്‍ലാല്‍ ഫാന്‍സ് അസോസിയേഷന്‍ സംസ്ഥാന ജനറല്‍ സെക്രട്ടറി വിമല്‍ കുമാറിനെ അഭിസംബോധന ചെയ്തും മുന്നറിയിപ്പും നല്‍കിയും യുആര്‍എംഎഫ്ഡബ്ലിയുഒ രംഗത്തെത്തി.
യുആര്‍എംഎഫ്ഡബ്ലിയുഒ എന്ന സംഘടനയ്ക്ക് തടസമായി വരരുത്. വന്നാല്‍ ഞങ്ങളും പ്രതികരിക്കും. ഞങ്ങള്‍ക്ക് ഞങ്ങളുടെ വഴി, നിങ്ങള്‍ക്ക് നിങ്ങളുടേതും.
യുആര്‍എംഎഫ്ഡബ്ലിയുഒ
എകെഎംഎഫ്‌സിഡബ്ലിയുഎ സംഘടനയിലെ ക്രമക്കേടുകള്‍ കണ്ട് മടുത്തതുകൊണ്ടാണ് പുറത്തുപോന്നതും സംഘടന രൂപീകരിച്ചതും. മോഹന്‍ലാലിന്റെ പേരില്‍ ചാരിറ്റി ചെയ്ത് മാന്യമായി മുന്നോട്ടുപോകുമെന്നും ഓര്‍ഗനൈസേഷന്‍ വ്യക്തമാക്കുന്നു.
