മലയാളികൾക്ക് ഒരിക്കലും മറക്കാൻ പറ്റാത്ത നായികാ മുഖങ്ങളിൽ ഒരാളായിരിക്കും സംവൃത സുനിൽ. ലാൽജോസിന്റെ രസികനിൽ തുടങ്ങി നിരവധി കഥാപാത്രങ്ങൾ പ്രേക്ഷകർക്ക് സമ്മാനിച്ച സംവൃത 'അയാളും ഞാനും തമ്മിൽ' എന്ന ലാൽ ജോസ് ചിത്രത്തിലൂടെയാണ് ഒരു കരിയർ ബ്രേക്ക് എടുക്കുന്നത്. അതുകൊണ്ടുതന്നെ, ആ സിനിമയും അതിലെ സൈനു എന്ന കഥാപാത്രവും 'അഴലിന്റെ ആഴങ്ങളിൽ' എന്ന പാട്ടും വളരെ പ്രിയപ്പെട്ടതാണ് എന്ന് ക്യു സ്റ്റുഡിയോയോട് പറയുകയാണ് സംവൃത സുനിൽ. അഴലിന്റെ ആഴങ്ങളിൽ പാട്ട് ഷൂട്ട് ചെയ്ത് കഴിഞ്ഞാണ് ബ്രേക്ക് എടുക്കുന്നത് എന്നും ആ പാട്ടിലെ പല സീനുകളിലും താൻ ശരിക്കും കരയുകയായിരുന്നുവെന്നും സംവൃത കൂട്ടിച്ചേർത്തു.

സംവൃത സുനിലിന്റെ വാക്കുകൾ

'അയാളും ഞാനും തമ്മിൽ' എന്ന സിനിമയെക്കുറിച്ചോ 'അഴലിന്റെ ആഴങ്ങളിൽ' എന്ന പാട്ടിനെക്കുറിച്ച് പറയുമ്പോഴോ ഞാൻ ഇമോഷണലാകും. കാരണം, ഇപ്പോഴും ആ പാട്ട് എനിക്ക് ഹൃദയത്തിൽ വലിയൊരു ഭാരം തരുന്ന ഒന്നാണ്. ഞാൻ എന്റെ കരിയറിൽ ഒരു ബ്രേക്ക് എടുക്കുന്നത് ആ പാട്ടിന്റെ ഷൂട്ട് കഴിഞ്ഞിട്ടാണ്. അതുകൊണ്ട് ഞാൻ വല്ലാതെ ഇമോഷണൽ ആയിരുന്നു. ഞാൻ സ്വയം എടുത്തൊരു തീരുമാനം ആയിരുന്നെങ്കിൽപ്പോലും അത് അത്രയ്ക്ക് എളുപ്പമായിരുന്നില്ല. അതുകൊണ്ട് ആ പാട്ടിൽ കരയുന്ന പല ഭാ​ഗങ്ങളിലും ഞാൻ ശരിക്കും കരയുകയായിരുന്നു.

സൈനു വളരെ പ്രിയപ്പെട്ട കഥാപാത്രമാണ്. ഏറ്റവും കൂടുതൽ ആരാധകരെ എനിക്ക് ലഭിച്ചത് ആ കഥാപാത്രത്തിലൂടെയാണ് എന്ന് എനിക്ക് തോന്നിയിട്ടുണ്ട്. അയാളും ഞാനും തമ്മിൽ സിനിമയുടെ വാർഷികം വരുന്ന സമയത്ത് എനിക്ക് ഒരുപാട് മെസേജുകളും കോളുകളും എല്ലാം ലഭിക്കാറുണ്ട്. മെഡിക്കൽ ഫീൽഡിലുള്ള ഒരുപാട് പേർക്ക് ആ കഥാപാത്രം ഒരുപാട് റിലേറ്റ് ചെയ്യാൻ പറ്റി എന്നുപറഞ്ഞ് വന്ന മെസേജുകളും ലെറ്ററുകളുമെല്ലാം വായിച്ചിട്ടുണ്ട്. എന്റെ കരിയറിലെ ഏറ്റവും പീക്ക് പോയിന്റിൽ നിൽക്കുമ്പോൾ ഞാൻ ചെയ്ത കഥാപാത്രവും സിനിമയുമാണ്. അതുകൊണ്ടുതന്നെ എനിക്കത് അത്രേമൽ പ്രിയപ്പെട്ടതുമാണ്.