യുഎഇയിലെ മലയാളി ഫിസിയോതെറാപ്പിസ്റ്റുകളുടെ കൂട്ടായ്മയായ ഫിസിയോ കണക്ട് യുഎഇയുടെ രണ്ടാമത് സംഗമമായ ഫിസിയോ കണക്ട് 2026 അബുദാബിയിലെ റോയൽ റോസ് ഹോട്ടലിൽ നടന്നു. യുഎഇയിലെ വിവിധ ആശുപത്രികളിൽ ജോലി ചെയ്യുന്ന മലയാളി ഫിസിയോതെറാപ്പിസ്റ്റുകൾ പങ്കെടുത്ത സംഗമത്തിൽ ഏകദേശം 150 പേർ പങ്കെടുത്തു. കൂട്ടായ്മയുടെ ആദ്യ സംഗമം കഴിഞ്ഞ വർഷം ദുബായില്‍ നടന്നിരുന്നു.
മുഖ്യാതിഥിയായ ഐഎംഎ ജിസിസി എക്സിക്യൂട്ടീവ് കൗൺസിൽ വൈസ് ചെയർപേഴ്സൺ ഡോ. നതാഷ ബെനസീർ അവാർഡുകൾ വിതരണം ചെയ്തു. യുഎഇയിലെ വിവിധ ആശുപത്രികളിൽ മികവിന് അംഗീകാരം നേടിയവരെ ചടങ്ങിൽ ആദരിച്ചു.
തിരുവാതിരക്കളി, സ്കിറ്റ്, സംഘഗാനം തുടങ്ങി വിവിധ കലാപരിപാടികളും അരങ്ങേറി. കമ്മിറ്റി ചെയർമാൻ ഹാഫിസുൽ അസദിന്റെ നേതൃത്വത്തിൽ നടന്ന പരിപാടിയിൽ ഷരീജ്, അശ്വിൻ, സെയ്നുൽ ആബിദ് എന്നിവർ സംസാരിച്ചു. ഹെന്ന നന്ദി പറഞ്ഞു.