ബ്രോ ഡാഡി വിത്ത് പ്രോ മമ്മി, ലൊക്കേഷന്‍ ചിത്രവുമായി പൃഥ്വിരാജ്
ഹൈദരാബാദില്‍ ചിത്രീകരണം പുരോഗമിക്കുന്ന ബ്രോ ഡാഡിയിലെ ലൊക്കേഷന്‍ ചിത്രം പങ്കുവച്ച് പൃഥ്വിരാജ് സുകുമാരന്‍.
മോഹന്‍ലാലിനും മല്ലിക സുകുമാനും ഒപ്പമുള്ള ഫോട്ടോയാണ് പൃഥ്വിരാജ് ഫേസ്ബുക്കില്‍ പങ്കുവച്ചിരിക്കുന്നത്. താന്‍ സംവിധാനം ചെയ്യുന്ന സിനിമയില്‍ അമ്മ മല്ലിക സുകുമാരന്‍ അഭിനയിക്കുന്നതിലെ ആഹ്ലാദം പൃഥ്വിരാജ് കഴിഞ്ഞ ദിവസം പങ്കുവച്ചിരുന്നു. ഇതിന് പിന്നാലെയാണ് പൃഥ്വിയും മോഹന്‍ലാലും മല്ലികക്കൊപ്പമുള്ള ഫോട്ടോ ഷെയര്‍ ചെയ്തിരിക്കുന്നത്.
പരമ്പരാഗത ക്രൈസ്തവ വേഷത്തിലാണ് മല്ലിക ഫോട്ടോയില്‍. എക്കാലത്തെയും മികച്ച നടനെയും ഏറ്റവും മികച്ച അമ്മയെയും സംവിധാനം ചെയ്യാന്‍ കഴിഞ്ഞാല്‍ എന്ന കാപ്ഷനോടെയായിരുന്നു പൃഥ്വി കഴിഞ്ഞ ദിവസം ഫോട്ടോ ഷെയര്‍ ചെയ്തത്.
2020ലെ വന്‍ പ്രഖ്യാപനങ്ങളിലൊന്നായ വാരിയംകുന്നന്‍ സിനിമയില്‍ നിന്ന് പൃഥ്വിരാജും ആഷിക് അബുവും പിന്‍മാറിയെന്ന വാര്‍ത്ത ചര്‍ച്ചയാകുന്ന ഘട്ടത്തിലാണ് പൃഥ്വിരാജ് ബ്രോ ഡാഡിയുടെ ലൊക്കേഷന്‍ ചിത്രം ഷെയര്‍ ചെയ്തിരിക്കുന്നത്.
സിനിമയില്‍ നിന്ന് പിന്‍മാറാനുള്ള കാരണത്തെക്കുറിച്ച് ആഷിക് അബുവും പൃഥ്വിരാജും ഔദ്യോഗികകമായി പ്രതികരിച്ചിട്ടില്ല. പൃഥ്വിക്കൊപ്പം നീലവെളിച്ചം എന്ന ചിത്രം ആഷിക് അബു പ്രഖ്യാപിച്ചിട്ടുണ്ട്.