രാജ്യം സമ്പൂര്‍ണ ലോക്ക് ഡൗണിലായിരിക്കെ വീട്ടിനകത്ത് നിലയുറപ്പിച്ചുള്ള കൊവിഡ് പ്രതിരോധം സര്‍ഗാത്മകമാക്കുകയാണ് പലരും. നിപാ, രണ്ട് പ്രളയം, ഓഖി തുടങ്ങിയ ദുരന്തങ്ങളെ അതിജീവിച്ച കേരളം കൊവിഡ് 19 മഹാമാരിയെയും തോല്‍പ്പിക്കുമെന്ന ആശയവുമായാണ് ജെ കൃഷ് ഒരുക്കിയ മലയാളി മാതൃക എന്ന റാപ് ആല്‍ബം. ലോക്ക് ഡൗണ്‍ വീട്ടിലിരുത്തിയപ്പോള്‍ സീറോ ബജറ്റ് റാപ് ആല്‍ബമെന്ന ചിന്തയിലേക്ക് ജെ കൃഷ് എന്ന ജയകൃഷ്ണന്‍ എത്തുകയായിരുന്നു. വീടിന്റെ ടെറസ് ആണ് ചിത്രീകരണത്തിനായി തെരഞ്ഞെടുത്തത്. ഗാനരചനയും സംഗീതവും ജയകൃഷ്ണന്‍ തന്നെ.
മലയാളം, ഇംഗ്ലീഷ് വരികളിലുള്ള ഗാനം പാടിയിരിക്കുന്നതും ജെ കൃഷ് ആണ്. ജോനാഥന്‍ ജോസ് പ്രോഗ്രാമിംഗിലും റെക്കോര്‍ഡിംഗിനും പിന്തുണ നല്‍കി. സുമേഷ് ടി സുധാകരനാണ് ക്യാമറ. എഡിറ്റിംഗ് ടോണി ജേക്കബ്. സലിം കുമാറാണ് ഫേസ്ബുക്ക് പേജിലൂടെ മലയാളി മാതൃക പുറത്തിറക്കിയത്.
ഭയ്യ ഭയ്യ, ആകാശമിഠായി എന്നീ സിനിമകളില്‍ റാപ് വരികള്‍ ഒരുക്കിയ ജയകൃഷ്ണന്‍ മിനി കൂപ്പര്‍ കേരളാ മാര്‍ക്കറ്റിംഗ് മാനേജറുമാണ്. തിരിച്ചു നാം തീര്‍ച്ചയും വരും എന്ന് തുടങ്ങുന്ന വരികളില്‍ ഉള്ള റാപ് ആല്‍ബത്തിന് സോംഗ് ഫോര്‍ ഹോപ് എന്ന ടാഗ് ലൈന്‍ ആണ് നല്‍കിയിരിക്കുന്നത്.