വസ്ത്രധാരണത്തിന്റെ കാര്യത്തിലും അഭിപ്രായത്തിന്റെ കാര്യത്തിലും സ്വയംപ്രഖ്യാപിത സദാചാര സംരക്ഷകരുടെയും വിശ്വാസ സംരക്ഷകരായ ആള്‍ക്കൂട്ടത്തിന്റെയും ആക്രമണവും സൈബര്‍ ബുള്ളിയിംഗും നിരന്തരം നേരിടേണ്ടി വരുന്നവരാണ് അഭിനേത്രിമാര്‍. മാജിദ് മജീദിയുടെ ബിയോണ്ട് ദ ക്ലൗഡ്‌സ് എന്ന സിനിമയിലൂടെ ബോളിവുഡില്‍ ചുവടുറപ്പിക്കുന്ന മലയാളി മാളവികാ മോഹനനാണ് ഇക്കൂട്ടരുടെ പുതിയ ഇര. വസ്ത്രധാരണത്തിന്റെ കാര്യത്തില്‍ പെരുമാറ്റച്ചട്ടം അടിച്ചേല്‍പ്പിക്കാന്‍ കമന്റിലെത്തിയ ആള്‍ക്കൂട്ടത്തെ മര്യാദ പഠിപ്പിച്ചിരിക്കുയാണ് മാളവിക. ഹാഫ് ജീന്‍സിലും ടീ ഷര്‍ട്ടിലുമായി നടത്തിയ ഫോട്ടോ ഷൂട്ട് ചിത്രം ഇന്‍സറ്റഗ്രാമില്‍ പോസ്റ്റ് ചെയ്ത മാളവിക അതിനൊപ്പം തമാശ കലര്‍ത്തി ഫോട്ടോ ഷൂട്ടിനെക്കുറിച്ചൊരു കുറിപ്പുമിട്ടു. ഇതിനുള്ള കമന്റിലാണ് മലയാളത്തിലും ഇംഗ്ലീഷിലുമായി മാളവികയെ വസ്ത്രധാരണത്തിലെ മാന്യതയും മാന്യയായ പെണ്‍കുട്ടി എങ്ങനെ വസ്ത്രം ധരിക്കണമെന്നുമുള്ള സദാചാര ക്ലാസുമായി ആളുകളെത്തിയത്.
മാന്യതയുള്ള പെണ്‍കുട്ടി എങ്ങനെയാണ് വസ്ത്രം ധരിക്കേണ്ടതെന്ന നിരവധി കമന്റുകളും അഭിപ്രായങ്ങളും കേട്ടു. അത് പരിഗണിച്ച് വളരെ മാന്യതയുള്ള രീതിയില്‍ വസ്ത്രം ധരിച്ച ഒരു ചിത്രം കൂടി പങ്കുവയ്ക്കുന്നു. എനിക്ക് ഇഷ്ടമുള്ളതെന്തോ അത് ഞാന്‍ ധരിക്കും.മാളവികാ മോഹനന്‍
ആദ്യം ഷെയര്‍ ചെയ്ത അതേ സീരീസിലുള്ള ഫോട്ടോ ഷൂട്ടിലെ ഒരു ചിത്രം കൂടി പങ്കുവച്ചാണ് സൈബര്‍ ബുള്ളിയിംഗ് കൂട്ടത്തെ മാളവികാ മോഹനന്‍ പൊളിച്ചടുക്കിയത്.
മലയാളത്തില്‍ ദുല്‍ഖര്‍ സല്‍മാനൊപ്പം പട്ടം പോലെ എന്ന സിനിമയില്‍ നായികയായിരുന്നു മാളവിക. നിര്‍ണായകം, ദ ഗ്രേറ്റ് ഫാദര്‍ എന്നീ സിനിമകളില്‍ കാരക്ടര്‍ റോളുകളിലെത്തിയ മാളവികയ്ക്ക് ലഭിച്ച ബ്രേക്ക് ആയിരുന്നു മാജിദ് മജീദിയുടെ ഹിന്ദി സിനിമ. ദീപികാ പദുക്കോണിനെ പരിഗണിച്ച റോളിലാണ് മാളവികയ്്ക്ക് അവസരം ലഭിച്ചത്. കാര്‍ത്തിക് സുബ്ബരാജ് സംവിധാനം ചെയ്ത രജിനികാന്ത് ചിത്രം പേട്ടയിലും മാളവിക അഭിനയിച്ചിരുന്നു. ബോളിവുഡിലെ മുന്‍നിര ഛായാഗ്രാഹകനായ കെ യു മോഹനന്റെയും മാധ്യമപ്രവര്‍ത്തക ബീനാ മോഹന്റെയും മകളാണ് മാളവികാ മോഹനന്‍.
രണ്ടാമത്തെ പോസ്റ്റിന് കമന്റില്‍ അഭിനന്ദനവുമായി പാര്‍വതി തിരുവോത്ത്, ശ്രിന്ദാ തുടങ്ങിയവര്‍ എത്തി.