വലിയ സ്കെയിലിൽ ഒരുങ്ങുന്ന പടമാണ് നഹാസ് ഹിദായത്ത് ഒരുക്കുന്ന ഐ ആം ​ഗെയിം എന്ന് ഛായാ​ഗ്രാഹകൻ ജിംഷി ഖാലിദ്. ആർഡിഎക്സ് എന്ന ഹിറ്റ് ചിത്രത്തിന് ശേഷം ദുൽഖർ സൽമാനെ നായകനാക്കി നഹാസ് ഹിദായത്ത് സംവിധാനം ചെയ്യുന്ന ചിത്രമാണ് ഐ ആം ​ഗെയിം. ആലപ്പുഴ ജിംഖാനയെക്കാൾ വലിയ ബഡ്ജറ്റിൽ ഒരുങ്ങുന്ന ചിത്രമാണ് ഐ ആം ​ഗെയിം എന്ന് ജിംഷി ഖാലിദ് ക്യു സ്റ്റുഡിയോയ്ക്ക് നൽകിയ അഭിമുഖത്തിൽ പറഞ്ഞു.

ജിംഷി ഖാലിദ് പറഞ്ഞത്:

ഐ ആം ഗെയിം എന്ന പടത്തിന്റെ കഥയില്‍ സ്‌പോര്‍ട്‌സിന് വലിയൊരു പ്രാധാന്യമുണ്ട്. ആലപ്പുഴ ജിംഖാനയെക്കാൾ വലിയൊരു സ്കെയിലിലുള്ള പടമാണ് ഐ ആം ​ഗെയിം. ജിംഖാനയെക്കാള്‍ ഐം ഗെയിമിന്റെ സ്‌കെയില്‍ വളരെ വളരെ വലുതാണ്. രണ്ട് പടങ്ങളും സ്‌പോര്‍ട്‌സുമായി ബന്ധപ്പെട്ടതുകൊണ്ടാണ് ഇത്തരത്തിൽ ഞാൻ താരതമ്യം ചെയ്യുന്നത്. അല്ലാതെ നോക്കിയാല്‍ ആലപ്പുഴ ജിംഖാന വളരെ ലൈറ്റ് ഹാര്‍ട്ടഡാണ്. ആലപ്പുഴ ജിംഖാനയിലെ കോൺഫ്ലിക്ടുകൾക്ക് അനുരാ​ഗ കരിക്കിൻ വെള്ളത്തിലെ കോണ്‌ഫ്ലിക്ടുകളുടെ അത്രപോലും ഡെപ്ത്ത് ഇല്ല. നമ്മൾ ഈ പിണങ്ങി എന്നൊക്കെ പറയുന്ന തരത്തിലുള്ള കോൺഫ്ലിക്ടുകൾ ആണ് ആ സിനിമയിൽ. അത്രയും ലൈറ്റ് ആണ്. ഒരു കൂട്ടം പിള്ളേര്‍ ബോക്‌സിങ് പഠിക്കാന്‍ പോകുന്നതും അതില്‍ നിന്ന് അവര്‍ക്ക് കിട്ടുന്ന ടേക്ക് എവേയുമാണ് ആലപ്പുഴ ജിംഖാനയിൽ കാണിക്കുന്നത്. നഹാസിന്റെ പടം അങ്ങനെയല്ല. അതിന്റെ സ്കെയിൽ വലുതാണ്. സ്പോർട്ട്സും വലുതാണ്.

ഐ ആം ​ഗെയിം ഒരു ആക്ഷൻ പാക്ക്ഡ് സിനിമയാണെന്നും ഒരു അഭിനേതാവ് എന്ന നിലയിലും ഒരു മാസ്സ് ഹീറോ എന്ന നിലയിലും ദുൽഖറിന് പെർഫോം ചെയ്യാനുള്ള സ്പേയ്സ് ചിത്രത്തിൽ ഉണ്ടെന്നും മുമ്പ് ക്യു സ്റ്റുഡിയോയ്ക്ക് നൽകിയ അഭിമുഖത്തിൽ സം​ഗീതസംവിധായകൻ ജെയ്ക്സ് ബിജോയ് പറഞ്ഞിരുന്നു.

ജെയ്ക്സ് ബിജോയ് പറഞ്ഞത്:

ഐ ആം ഗെയിം നഹാസിന്റെ ആദ്യ സിനിമയായ ആർഡിഎക്സ് പോലെ ഒരു ആക്ഷൻ പാക്ക്ഡ് സിനിമയാണ്. അതിൽ ഒരു ആക്ടർ എന്ന നിലയിലും ഒരു മാസ്സ് ഹീറോ എന്ന തരത്തിലും ദുൽഖറിന് ഒരുപാട് എക്സ്പ്ലോർ ചെയ്യാനുള്ള സ്പേസ് ഐ ആം ഗെയ്മിലുണ്ട്. ആ സിനിമയുടെ സൗണ്ട് സ്കേപ്പും വളരെ ഇന്ററസ്റ്റിം​ഗ് ആണ്. അതിൽ ​ഗാംബ്ലിങ് മൊമെന്റ്‌സ്‌ ഉണ്ട്, ക്രിക്കറ്റ് മൊമെന്റ്‌സ്‌ ഉണ്ട്. അങ്ങനെ എല്ലാം കൂടി ചേർന്നൊരു ബിഗ് കാൻവാസ്‌ എന്റർടെയ്നിങ് മൂവി ആകും ഐ ആം ഗെയിം. അത് അടിപൊളിയായിരിക്കും.

2023 ൽ പുറത്തിറങ്ങിയ 'കിംഗ് ഓഫ് കൊത്ത'യാണ് ദുൽഖറിന്റേതായി പുറത്തിറങ്ങിയ അവസാന മലയാള ചിത്രം. ഒരു ഇടവേളയ്ക്ക് ശേഷം ദുൽഖർ മലയാള സിനിമയിലേക്ക് തിരിച്ചു വരുന്ന ചിത്രം കൂടിയാണ് ഐ ആം ​ഗെയിം. നഹാസ് ഹിദായത്തിന്റെ കഥയിൽ സജീർ ബാബ, ബിലാൽ മൊയ്‌തു, ഇസ്മായേൽ അബുബക്കർ എന്നിവർ ചേർന്നാണ് സിനിമയ്ക്ക് തിരക്കഥ ഒരുക്കുന്നത്. ജിംഷി ഖാലിദ് ഛായാഗ്രഹണം നിർവഹിക്കുന്ന സിനിമയുടെ എഡിറ്റിംഗ് കൈകാര്യം ചെയ്യുന്നത് ചമൻ ചാക്കോ ആണ്. ജെയ്ക്സ് ബിജോയ് ആണ് സിനിമയുടെ സം​ഗീത സംവിധാനം നിർവഹിക്കുന്നത്. വെങ്കി അറ്റ്ലൂരി സംവിധാനം ചെയ്ത ലക്കി ഭാസ്കർ ആണ് ദുൽഖറിന്റേതായി പുറത്തിറങ്ങിയ അവസാന ചിത്രം.