ദുൽഖർ സൽമാനെ നായകനാക്കി നഹാസ് ഹിദായത്ത് സംവിധാനം ചെയ്യുന്ന ഐ ആം ​ഗെയിം ഒരു ആക്ഷൻ പാക്ക്ഡ് സിനിമയാണെന്ന് സംഗീതസംവിധായകൻ ജെയ്ക്സ് ബിജോയ്. ആർഡിഎക്സ് എന്ന ചിത്രത്തിന് ശേഷം നഹാസ് സംവിധാനം ചെയ്യുന്ന ചിത്രമാണ് ഐ ആം ​ഗെയിം. വൻ ബഡ്ജറ്റിൽ ഒരുങ്ങുന്ന ചിത്രത്തിൽ ഒരു അഭിനേതാവ് എന്ന നിലയിലും ഒരു മാസ്സ് ഹീറോ എന്ന നിലയിലും ദൂൽഖറിന് പെർഫോം ചെയ്യാനുള്ള സ്പേയ്സ് ഉണ്ടെന്നും അടിപൊളി ചിത്രമായിരിക്കും സിനിമ എന്നും സം​ഗീതസംവിധായകൻ ജെയ്ക്സ് ബിജോയ് ക്യു സ്റ്റുഡിയോയ്ക്ക് നൽകിയ അഭിമുഖത്തിൽ പറഞ്ഞു.

ജെയ്ക്സ് ബിജോയ് പറഞ്ഞത്:

ഐ ആം ഗെയിം നഹാസിന്റെ ആദ്യ സിനിമയായ ആർഡിഎക്സ് പോലെ ഒരു ആക്ഷൻ പാക്ക്ഡ് സിനിമയാണ്. അതിൽ ഒരു ആക്ടർ എന്ന നിലയിലും ഒരു മാസ്സ് ഹീറോ എന്ന തരത്തിലും ദുൽഖറിന് ഒരുപാട് എക്സ്പ്ലോർ ചെയ്യാനുള്ള സ്പേസ് ഐ ആം ഗെയ്മിലുണ്ട്. ആ സിനിമയുടെ സൗണ്ട് സ്കേപ്പും വളരെ ഇന്ററസ്റ്റിം​ഗ് ആണ്. അതിൽ ​ഗാംബ്ലിങ് മൊമെന്റ്‌സ്‌ ഉണ്ട്, ക്രിക്കറ്റ് മൊമെന്റ്‌സ്‌ ഉണ്ട്. അങ്ങനെ എല്ലാം കൂടി ചേർന്നൊരു ബിഗ് കാൻവാസ്‌ എന്റർടെയ്നിങ് മൂവി ആകും ഐ ആം ഗെയിം. അത് അടിപൊളിയായിരിക്കും.

2023 ൽ പുറത്തിറങ്ങിയ 'കിംഗ് ഓഫ് കൊത്ത'യാണ് ദുൽഖറിന്റേതായി പുറത്തിറങ്ങിയ അവസാന മലയാള ചിത്രം. ഒരു ഇടവേളയ്ക്ക് ശേഷം ദുൽഖർ മലയാള സിനിമയിലേക്ക് തിരിച്ചു വരുന്ന ചിത്രം കൂടിയാണ് ഐ ആം ​ഗെയിം. നഹാസ് ഹിദായത്തിന്റെ കഥയിൽ സജീർ ബാബ, ബിലാൽ മൊയ്‌തു, ഇസ്മായേൽ അബുബക്കർ എന്നിവർ ചേർന്നാണ് സിനിമയ്ക്ക് തിരക്കഥ ഒരുക്കുന്നത്. ജിംഷി ഖാലിദ് ഛായാഗ്രഹണം നിർവഹിക്കുന്ന സിനിമയുടെ എഡിറ്റിംഗ് കൈകാര്യം ചെയ്യുന്നത് ചമൻ ചാക്കോ ആണ്. ജെയ്ക്സ് ബിജോയ് ആണ് സിനിമയുടെ സം​ഗീത സംവിധാനം നിർവഹിക്കുന്നത്. വെങ്കി അറ്റ്ലൂരി സംവിധാനം ചെയ്ത ലക്കി ഭാസ്കർ ആണ് ദുൽഖറിന്റേതായി പുറത്തിറങ്ങിയ അവസാന ചിത്രം. ചിത്രത്തിന് മികച്ച പ്രതികരണമാണ് തിയറ്ററിലും ഒടിടിയിലും ലഭിച്ചത്. ബോക്സ് ഓഫീസിൽ ചിത്രം 100 കോടി പിന്നിട്ടിരുന്നു.