അജിത് കുമാർ ചിത്രമായ വലിമൈയിലെ നാങ്ക വേറെ മാരി എന്ന ലിറിക്കൽ ഗാനം റിലീസ് ചെയ്ത് മണിക്കൂറുകൾക്കുള്ളിൽ യൂട്യൂബിൽ തരംഗമാകുന്നു. പത്ത് മണിക്കൂർ കൊണ്ട് 39 ലക്ഷം പേരാണ് യൂട്യൂബിൽ ലിറിക്കൽ ഗാനം കണ്ടിരിക്കുന്നത്. ലിറിക്കൽ വീഡിയോയിൽ ഗാനത്തിന്റെ ചിത്രീകരണ രംഗങ്ങളും കാണിക്കുന്നുണ്ട്. വലിമൈയിലെ ആദ്യ ലിറിക്കൽ വീഡിയോ ഗാനമാണ് റിലീസ് ചെയ്തിരിക്കുന്നത്.

വിഘ്നേഷ് ശിവന്റെ വരികൾക്ക് യുവൻ ശങ്കർ രാജയാണ് സംഗീതം നൽകിയിരിക്കുന്നത് . യുവൻ ശങ്കർ രാജ, അനുരാഗ് കുൽക്കർണി എന്നിവരാണ് ഗാനം ആലപിച്ചിരിക്കുന്നത്. 'നേര്‍ക്കൊണ്ട പാര്‍വൈ' എന്ന ചിത്രത്തിന് ശേഷം എച്ച് വിനോദ് സംവിധാനം ചെയ്യുന്ന സിനിമയാണ് വലിമൈ

റേസിംഗ് പശ്ചാത്തലത്തില്‍ ഒരുങ്ങുന്ന ചിത്രത്തിലെ സ്റ്റണ്ട് സ്വീക്വന്‍സ്‌ ചിത്രീകരിക്കുന്നതിനിടെ അജിത്തിന് പരിക്കേറ്റിരുന്നു. ഡ്യൂപ്പില്ലാതെയാണ് നടന്‍ ബൈക്ക് സ്റ്റണ്ട് രംഗങ്ങള്‍ ചെയ്തത്. ഷൂട്ടിനിടെ ബൈക്കിന്റെ നിയന്ത്രണം നഷ്ടപ്പെടുകയും തെറിച്ചുവീഴുകയുമായിരുന്നു. ചിത്രത്തിനായി നിരവധി വിദഗ്ധ ടെക്‌നീഷ്യന്‍മാരെയും സ്റ്റണ്ട് വിദഗ്ധരെയുമാണ് എത്തിച്ചത്. ബോണി കപൂറാണ് നിർമ്മാണം.