നടി തപ്സി പന്നുവിനെ അഭിനന്ദിച്ച് ബോളിവുഡ് താരം സ്വര ഭാസ്ക്കര്. തപ്സി പന്നുവിന്റെ വസതിയിൽ ഇന്നലെ ആദായ നികുതി വകുപ്പ് റെയ്ഡ് നടത്തിയതിന് പിന്നാലെയാണ് താരത്തെ അഭിനന്ദിച്ചുക്കൊണ്ട് സ്വര ഭാസ്ക്കര് രംഗത്ത് എത്തിയിരിക്കുന്നത്. ഇന്നത്തെ കാലത്ത് ഇത്രയും ഉറച്ച നിലപാടുള്ളവർ വളരെ ചുരുക്കമാണെന്നും കരുത്തുള്ള പോരാളിയായി നിലകൊള്ളാനും സ്വര ട്വിറ്ററിലൂടെ ആശംസിച്ചു.
ഇത് തപ്സിക്കുള്ള അഭിനന്ദന ട്വീറ്റാണ്. ഇന്നത്തെ കാലത്ത് ഇത്ര ധീരയും, ഉറച്ച നിലപാടുമുള്ള പെൺകുട്ടികൾ ചുരുക്കമാണ്. കരുത്തുള്ള പോരാളിയായി നിലകൊള്ളുക.സ്വര ഭാസ്കർ
ബോളിവുഡ് സംവിധായകന് അനുരാഗ് കശ്യപ്, സംവിധായകനും നിര്മ്മാതാവുമായ വികാസ് ബഹല്, മധു മന്തേന എന്നിവരുടെ വീടുകളിലും വസ്തുവകകളിലും ആദായനികുതി വകുപ്പ് റെയ്ഡ് നടത്തിയിരുന്നു. 2018 ല് പിരിച്ചുവിട്ട അനുരാഗ് കശ്യപിന്റെ നേതൃത്വത്തിലുള്ള ഫാന്റം ഫിലിംസുമായി ബന്ധപ്പെട്ടാണ് റെയ്ഡെന്നാണ് വിശദീകരണം. മുംബൈയിലെ പ്രശസ്തമായ സെലിബ്രിറ്റി മാനേജ്മെന്റ് ഏജന്സികളിലും റെയ്ഡ് നടന്നു.
കേന്ദ്ര സര്ക്കാരിന്റെയും ബിജെപിയുടെയും നയങ്ങളെ നിശിതമായി വിമര്ശിക്കുന്നവരാണ് സംവിധായകന് അനുരാഗ് കശ്യപും നടി തപ്സി പന്നവും. സംഘപരിവാറിന്റെ ധ്രുവീകരണ രാഷ്ട്രീയത്തിനെതിരെയും ഇരുവരും പരസ്യ നിലപാടെടുത്തിട്ടുണ്ട്. ബിജെപി സര്ക്കാരിന്റെ രാഷ്ട്രീയ നീക്കമാണ് റെയ്ഡെന്നും ആരോപണമുയരുന്നുണ്ട്. ബിജെപിക്കെതിരെ ശബ്ദിക്കുന്നവരെ കേന്ദ്ര ഏജന്സികളെ ഉപയോഗിച്ച് ഇല്ലാതാക്കാനുള്ള ശ്രമമാണ് ഐടി റെയ്ഡെന്ന് സാമൂഹ്യമാധ്യമങ്ങളിലും പ്രതികരണമുയരുന്നുണ്ട്.