എസ്. എസ് രാജമൗലി സംവിധാനം ചെയ്യുന്ന ഏറ്റവും പുതിയ ചിത്രമായ ആര്.ആര്.ആറിന്റെ റിലീസ് തിയതി മാറ്റിവെച്ചു. ഒമിക്രോണ് ഭീതിയെത്തുടര്ന്ന് രാജ്യത്തെ തിയേറ്ററുകള് അടക്കുന്നത് മുന്നില് കണ്ടാണ് റിലീസ് തിയതി മാറ്റിവെക്കുന്നതെന്ന് അണിയറ പ്രവര്ത്തകര് അറിയിച്ചു.
"എല്ലാവരുടെയും നന്മയെക്കരുതി ഞങ്ങളുടെ ചിത്രത്തിന്റെ റിലീസ് നീട്ടിവെക്കാന് ഞങ്ങള് നിര്ബന്ധിതരായിരിക്കുകയാണ്. നിരുപാധികമായ സ്നേഹത്തിന് ആരാധകരോടും മറ്റ് സിനിമാപ്രേമികളോടും ഞങ്ങളുടെ ആത്മാര്ഥമായ നന്ദി അറിയിക്കുന്നു. ഞങ്ങള് കഠിനമായി പരിശ്രമിച്ചെങ്കിലും ചില സാഹചര്യങ്ങള് നമ്മുടെ നിയന്ത്രണത്തിലല്ല. പല ഇന്ത്യന് സംസ്ഥാനങ്ങളും തിയറ്ററുകള് അടയ്ക്കുന്ന സാഹചര്യത്തില് ഞങ്ങള്ക്ക് മറ്റൊരു വഴിയില്ല. ആകാംക്ഷ കാത്തുസൂക്ഷിക്കുക എന്ന് മാത്രമേ നിങ്ങളോട് പറയാനുള്ളൂ. ഇന്ത്യന് സിനിമയുടെ ഈ യശസ്സിനെ ശരിയായ സമയത്ത് ഞങ്ങള് നിങ്ങളിലേക്ക് എത്തിക്കും", ആര്ആര്ആര് നിര്മ്മാതാക്കള് പുറത്തിറക്കിയ കുറിപ്പില് പറയുന്നു.
ബാഹുബലിക്ക് ശേഷമുള്ള രാജമൗലിയുടെ ആദ്യ ചിത്രം കൂടിയാണ് ആര്.ആര്.ആര്. രാം ചരണും ജൂനിയര് എന്.ടി.ആറുമാണ് ചിത്രത്തില് പ്രധാനവേഷങ്ങളില് എത്തുന്നത്. ഇതിന് പുറമേ ആലിയ ഭട്ടും അജയ് ദേവ്ഗണും ചിത്രത്തില് പ്രധാന വേഷങ്ങളിലെത്തുന്നുണ്ട്. ബോളിവുഡിലെയും ടോളിവുഡിലേയും പ്രമുഖ താരങ്ങളാണ് ഈ ചിത്രത്തില് അണിനിരക്കുന്നത്. വി. വിജയേന്ദ്രപ്രസാദാണ് ചിത്രത്തിന്റെ തിരക്കഥ.
ചിത്രത്തിന്റെ എഡിറ്റിംഗ് ശ്രീകര് പ്രസാദും ഛായാഗ്രഹണം കെ കെ സെന്തില് കുമാറും നിര്വഹിക്കുന്നു. ഡി.വി.വി. ദാനയ്യയാണ് ചിത്രത്തിന്റെ നിര്മ്മാതാവ്. സംഗീതം: എം.എം. കീരവാണിയാണ് നിര്വഹിക്കുന്നത്. ജൂനിയര് എന്.ടി.ആര്. കൊമരു ഭീം ആയും രാം ചരണ് അല്ലൂരി സീതരാമ രാജുവായിട്ടുമാണ് ചിത്രത്തില് എത്തുന്നത്. ചിത്രത്തില് സീത എന്ന കഥാപാത്രത്തിനെയാണ് ആലിയ അവതരിപ്പിക്കുന്നത്.