എക്‌സോര്‍സിസ്റ്റ് എന്ന ചിത്രത്തിന് ശേഷം ഭൂതകാലമല്ലാതെ ഇത്രയും റിയലിസ്റ്റിക്കായൊരു ഹൊറര്‍ സിനിമ താന്‍ കണ്ടിട്ടില്ലെന്ന് സംവിധായകന്‍ രാം ഗോപാല്‍ വര്‍മ്മ. ട്വിറ്ററിലൂടെയായിരുന്നു രാം ഗോപാല്‍ വര്‍മ്മയുടെ പ്രതികരണം.
എക്‌സോര്‍സിസ്റ്റ് എന്ന ചിത്രത്തിന് ശേഷം ഭൂതകാലമല്ലാതെ ഇത്രയും റിയലിസ്റ്റിക്കായൊരു ഹൊറര്‍ സിനിമ ഞാന്‍ കണ്ടിട്ടില്ല. സിനിമയില്‍ ഉടനീളം ആ അന്തരീക്ഷം നിലനിര്‍ത്താനായതിന് സംവിധായകന്‍ രാഹുല്‍ ശിവദാസിന് അഭിനന്ദനം. ഒപ്പം നിര്‍മ്മാതാവ് അന്‍വര്‍ റഷീദിനും അഭിനന്ദം അറിയിക്കുന്നു. ഷെയിന്‍ നിഗം അതിഗംഭീര പ്രകടനമാണ് കാഴ്ച്ചവെച്ചത്. - എന്നാണ് അദ്ദേഹം ട്വീറ്റ് ചെയ്തത്.
ജനുവരി 21ന് സോണി ലിവ്വിലൂടെയാണ് ഭൂതകാലം റിലീസ് ചെയ്തത്. ചിത്രത്തെ കുറിച്ച് മികച്ച പ്രതികരണങ്ങളാണ് ലഭിച്ചുകൊണ്ടിരിക്കുന്നത്. ഷെയിന്‍ നിഗത്തിന്റെ പ്രകടനത്തിനും പ്രേക്ഷകര്‍ മികച്ച അഭിപ്രായമാണ് നല്‍കുന്നത്.
അമ്മയും മകന്റെയും ജീവിതത്തില്‍ സംഭവിക്കുന്ന ദുരൂഹമായ സംഭവങ്ങളെ കുറിച്ചാണ് ചിത്രം പറയുന്നത്. ചിത്രത്തില്‍ രേവതിയാണ് ഷെയിനിന്റെ അമ്മയുടെ വേഷം അവതരിപ്പിക്കുന്നത്. രാഹുല്‍ സദാശിവനാണ് ഭൂതകാലത്തിന്റെ സംവിധായകന്‍. പ്ലാന്‍ ടി ഫിലിംസും ഷെയിന്‍ നിഗം ഫിലിംസും അന്‍വര്‍ റഷീദും ചേര്‍ന്നാണ് ചിത്രം ഒരുക്കിയിരിക്കുന്നത്. രാഹുല്‍ ശിവദാസും ശ്രീകുമാര്‍ ശ്രേയസുമാണ് ചിത്രത്തിന്റെ തിരക്കഥ.
ചിത്രത്തില്‍ ഷെയിനിനും രേവതിക്കും പുറമെ സൈതു കുറുപ്പ്, ജെയിംസ് എലിയ, ആതിര പട്ടേല്‍ എന്നിവരും പ്രധാന കഥാപാത്രങ്ങളാണ്. ഷെഹ്നാദ് ജലാലാണ് ഛായാഗ്രഹണം. ഷഫീക്ക് മുഹമ്മദ് അലിയാണ് എഡിറ്റര്‍. ഗോപി സുന്ദറാണ് ചിത്രത്തിന്റെ പശ്ചാത്തല സംഗീതം ഒരുക്കിയിരിക്കുന്നത്.