തന്റെ അഭിനയ ജീവിതത്തിന്റെ ആദ്യകാലത്ത് അനുഭവിക്കേണ്ടി വന്ന അപമാനത്തെപ്പറ്റി തുറന്നു പറഞ്ഞ് നടി പ്രിയങ്ക ചോപ്ര. ഒരു രഹസ്യ ഏജന്റ് കഥാപാത്രമായ താൻ ഒരാളെ വശീകരിക്കുന്ന സീനിൽ വസ്ത്രം അഴിച്ചു മാറ്റുമ്പോൾ അടിവസ്ത്രം കാണണമെന്ന് സംവിധായകൻ ആവശ്യപ്പെട്ടു . അടിവസ്ത്രം കാണിച്ചില്ലെങ്കിൽ പിന്നെന്തിനാണ് ആരെങ്കിലും ഈ സിനിമ കാണാൻ വരുന്നത് എന്ന് അയാൾ തന്റെ സ്റ്റൈലിസ്റ്റിനോട് ചോദിച്ചുവെന്നും അന്താരാഷ്ട്ര മാധ്യമമായ ദ സോ റിപ്പോർട്ടിന് നൽകിയ അഭിമുഖത്തിൽ പ്രിയങ്ക ചോപ്ര പറഞ്ഞു.

2002- 2003 കാലഘട്ടത്തിലാണ് ഇത് സംഭവിച്ചത്. താൻ അന്ന് സിനിമയിൽ പുതുമുഖമായിരുന്നുവെന്ന് പ്രിയങ്ക ചോപ്ര പറയുന്നു. തികച്ചും 'മനുഷ്യത്വരഹിതമായ നിമിഷം' എന്നാണ് പ്രിയങ്ക ഈ അനുഭവത്തെ വിശേഷിപ്പിക്കുന്നത്.

'അടിവസ്ത്രം കാണിച്ചില്ലെങ്കിൽ പിന്നെന്തിനാണ് ആരെങ്കിലും ഈ സിനിമ കാണാൻ വരുന്നത് എന്ന് അയാൾ ചോദിച്ചു. പക്ഷേ അയാൾ അത് എന്നോടല്ല എന്റെ മുന്നിലിരുന്ന എന്റെ സ്‌റ്റൈലിസ്റ്റിനോട് പറഞ്ഞത്. എന്റെ കലയോ ഞാൻ സിനിമയ്ക്ക് എന്ത് സംഭാവന ചെയ്യുമെന്നതോ അവർക്ക് പ്രധാനമല്ലായിരുന്നു. അവർ എന്നെ ഉപയോഗിക്കാനാണ് ശ്രമിച്ചത്'.

പ്രിയങ്ക ചോപ്ര

ഈ സംഭവം കഴിഞ്ഞ് രണ്ട് ദിവസത്തിന് ശേഷം താൻ സിനിമയിൽ നിന്ന് ഇറങ്ങിയെന്നും അച്ഛന്റെ നിർബന്ധപ്രകാരം അവർ തനിക്ക് വേണ്ടി ചിലവഴിച്ച പണം തിരികെ നൽകിയെന്നും പ്രിയങ്ക പറഞ്ഞു.'പിന്നീട് ഒരിക്കലും ആ സംവിധായകന്റെ മുഖത്തു നോക്കാൻ പോലും എനിക്ക് ഇഷ്ടമായിരുന്നില്ല.' പ്രിയങ്ക അഭിമുഖത്തിൽ കൂട്ടിച്ചേർത്തു