മുതിര്ന്ന ഗായിക ലതാ മങ്കേഷ്കറിന്റെ വേര്പാടില് അനുശോചനം രേഖപ്പെടുത്തി മുഖ്യമന്ത്രി പിണറായി വിജയന്. ആലാപനമാധുരി കൊണ്ട് ലോകത്തിന്റെ ഹൃദയം കീഴടക്കിയ സമാനതയില്ലാത്ത സംഗീതജ്ഞയായിരുന്നു ലതാ മങ്കേഷ്കര് എന്നാണ് പിണറായി വിജയന് കുറിച്ചത്.
മുഖ്യമന്ത്രിയുടെ വാക്കുകള്:
ആലാപനമാധുരി കൊണ്ട് ലോകത്തിന്റെ ഹൃദയം കീഴടക്കിയ സമാനതയില്ലാത്ത സംഗീതജ്ഞയായിരുന്നു ലതാമങ്കേഷ്കര്. അവരുടെ പാട്ടിനൊപ്പം വളര്ന്ന പല തലമുറകള് ഉണ്ട്. അവരുടെയെല്ലാം മനസ്സില് മായ്ക്കാനാവാത്ത സ്ഥാനമാണ് ലതാമങ്കേഷ്കര്ക്കുള്ളത്. പല പതിറ്റാണ്ടുകള് മറ്റാരുമായും താരതമ്യപ്പെടുത്താനാവാത്തത്ര ഉയരത്തില് നിന്ന ഈ ഗായിക ഹിന്ദിയില് മാത്രമല്ല ഇന്ത്യയിലെ വ്യത്യസ്തങ്ങളായ നിരവധി ഭാഷകളില് ഗാനങ്ങള് ആലപിച്ചു. മലയാളിക്കും അവരുടെ നാവിന്തുമ്പിലെ മലയാളത്തിന്റെ മധുരം അനുഭവിക്കാന് ഭാഗ്യമുണ്ടായി. ലതാ മങ്കേഷ്കറുടെ വിയോഗത്തില് ദുഃഖിക്കുന്ന സംഗീത ലോകത്തെയാകെ ദുഃഖം അറിയിക്കുന്നു.
കൊവിഡ് ബാധയെ തുടര്ന്ന് ദീര്ഘനാളായി ചികിത്സയില് കഴിയവെയാണ് ലതാ മങ്കേഷ്കറിന്റെ അന്ത്യം. ഇതിനിടെ ആരോഗ്യസ്ഥിതി മെച്ചപ്പെട്ടങ്കിലും ഇന്നലെ വീണ്ടും ഗുരുതരാവസ്ഥയിലായതിനെ തുടര്ന്ന് വെന്റിലേറ്ററിലേക്ക് മാറ്റുകയായിരുന്നു. അവസാന നിമിഷവും ലത മങ്കേഷ്കര് ജീവിതത്തിലേക്ക് തിരിച്ചുവരുമെന്ന പ്രതീക്ഷയിലായിരുന്നു രാജ്യം.