പാര്വ്വതി തിരുവോത്തിനെ നായികയാക്കി സിദ്ധാര്ഥ ശിവ സംവിധാനം ചെയ്യുന്ന 'വര്ത്തമാന'ത്തിന് മികച്ച തിയറ്റര് കൗണ്ട്. ഈ മാസം 12ന് റിലീസ് പ്രഖ്യാപിച്ചിരിക്കുന്ന ചിത്രം രാജ്യത്തെ 300 തിയറ്ററുകളിലാണ് റിലീസ് ആകുന്നത്. സെക്കൻഡ് ഷോയുമായി ബന്ധപ്പെട്ട് തീയറ്ററുകൾ അടച്ചിടുമോ എന്ന ആശങ്ക നിലനിൽക്കെയാണ് സിനിമ മാർച്ച് 12 ന് തന്നെ തീയറ്ററുകളിൽ റിലീസ് ചെയ്യുമെന്ന് സിനിമയുടെ അണിയറപ്രവർത്തകർ വ്യക്തമാക്കിയത്.
ജെഎന്യു സമരം പ്രമേയമായ ചിത്രത്തിന് സെന്സര് ബോര്ഡ് അനുമതി നിഷേധിച്ചത് നേരത്തെ വിവാദം ആയിരുന്നു. മുംബൈ സെന്സര് റിവിഷന് കമ്മിറ്റി ആണ് ചെറുമാറ്റത്തോടെ ചിത്രത്തിന് പ്രദര്ശന അനുമതി നല്കിയത്. കേരളത്തില് നിന്ന് ഡല്ഹിയിലേക്ക് ഉപരിപഠനത്തിന് എത്തുന്ന കഥാപാത്രത്തെയാണ് പാര്വതി തിരുവോത്ത് അവതരിപ്പിക്കുന്നത്. ആര്യാടന് ഷൗക്കത്താണ് വര്ത്തമാനത്തിന്റെ തിരക്കഥാകൃത്ത്. തിരക്കഥാകൃത്തിന്റെ കുലവും ഗോത്രവും നോക്കിയാണോ പ്രദര്ശനാനുമതി നല്കുന്നതെന്നും അത് അംഗീകരിക്കാനാവില്ലെന്നും ആര്യാടന് ഷൗക്കത്ത് വ്യക്തമാക്കിയിരുന്നു.
ചിത്രത്തിന്റെ ചില രംഗങ്ങള് ദേശവിരുദ്ധമാണെന്നും മതസൗഹാര്ദ്ദം തകര്ക്കുന്നതാണെന്നും ചൂണ്ടിക്കാട്ടിയാണ് സെന്സര് ബോര്ഡ് അനുമതി നിഷേധിച്ചിരുന്നത്. ഫാസിയ സൂഫിയ എന്ന ഗവേഷക വിദ്യാര്ത്ഥിയെയാണ് പാര്വതി തിരുവോത്ത് അവതരിപ്പിക്കുന്നത്. റോഷന് മാത്യു, സിദ്ധീഖ്, നിര്മ്മല് പാലാഴി എന്നിവരും കഥാപാത്രങ്ങളാണ്. ബെന്സി പ്രൊഡക്ഷന്സിന്റെ ബാനറില് ബേനസീറും ആര്യാടന് ഷൗക്കത്തും ചേര്ന്നാണ് നിര്മ്മാണം. നിവിന് പോളി നായകനായ സഖാവിന് ശേഷം സിദ്ധാര്ത്ഥ ശിവ സംവിധാനം ചെയ്യുന്ന സിനിമയാണ് വര്ത്തമാനം