ലോക എന്ന സിനിമയുടെ ലോകം പ്രേക്ഷകരിലേക്ക് എത്തുന്നത് സാധാരണക്കാരനായ സണ്ണിയുടെ മനസിലൂടെയാണ് എന്ന് സംവിധായകൻ ഡൊമിനിക് അരുൺ. ഈ സിനിമാറ്റിക് യൂണിവേഴ്സിലേക്കുള്ള ഒരു വാതിൽ മാത്രമാണ് ചന്ദ്ര. ഇനിയും അത് വലുതാകും. നമ്മൾ സിനിമയിൽ കണ്ട ചെറിയ സ്ഥലങ്ങൾ പിന്നീട് വലുതാകുമെന്നും ഡൊമിനിക് അരുണും നിമിഷ് രവിയും ക്യു സ്റ്റുഡിയോയോട് പറഞ്ഞു.
നിമിഷ് രവിയുടെയും ഡൊമിനിക് അരുണിന്റെയും വാക്കുകൾ
ഞങ്ങളുടെ ഒരു ഏസ്തെറ്റിക്കൽ ചോയ്സ് കൂടി ഇതിലുണ്ട്. ഈ ലോകം വളരെ പതിയെ പരിചിതമാക്കണം എന്നൊരു തീരുമാനം ഞങ്ങൾക്കുണ്ടായിരുന്നു. ഇപ്പൊ ജിടിഎ വൈസ് സിറ്റിയൊക്കെ കളിക്കുമ്പോൾ ഓരോ മിഷൻ തീരുമ്പോഴാണല്ലോ പുതിയ പുതിയ സിറ്റികളിലേക്കും സ്ഥലങ്ങളിലേക്കും വ്യാപിക്കുക. അത്തരത്തിൽ വലിയൊരു ലോകത്തിലേക്കുള്ള ഒരു ചെറിയ വാതിൽ മാത്രമാണ് ചന്ദ്ര. ഇതിൽ കാണിച്ച സ്ഥലങ്ങളെല്ലാം അടുത്ത ഭാഗങ്ങളിൽ വലുതായേക്കാം.
ഇങ്ങനെ നമ്മുടെ മിത്തിൽ നിന്നുള്ള ഒരു കഥാപാത്രത്തിന്റെ കഥ പറയണം എന്നുണ്ടായിരുന്നു. പക്ഷെ സാധാരണ കാണിക്കുന്നത് പോലെ ഒരു റൂറൽ സെറ്റിങ്ങിൽ പ്ലേസ് ചെയ്യുകയോ കാണിക്കുകയോ ചെയ്യേണ്ട എന്നുണ്ടായിരുന്നു. അത് ഒരു മെട്രോപൊളിറ്റൻ സിറ്റിയിൽ പ്ലേസ് ചെയ്തുകൊണ്ട് കുറച്ചുകൂടി മോഡേൺ ആക്കാം എന്ന് തീരുമാനിക്കുന്നു. എന്നാൽ അത് റൂട്ടഡായി തന്നെ തുടരണം. ഈ കഥയും ലോകവും നമ്മൾ അറിയുന്നതും കാണുന്നതും സണ്ണിയിലൂടെയാണ്. അതൊരു കോമൺ മാൻ പേഴ്സ്പെക്ടീവാണ്. നമുക്ക് എന്തും എഴുതാമല്ലോ. പക്ഷെ, അത് പ്രാക്ടിക്കാലിറ്റിയിലേക്ക് കൊണ്ടുവരിക എന്നതായിരുന്നു ഇനീഷ്യൽ തോട്ട്.