വൈക്കം മുഹമ്മദ് ബഷീറിന്റെ 'ഭാര്‍ഗ്ഗവിനിലയം' എന്ന തിരക്കഥയെ അടിസ്ഥാനമാക്കി ആഷിഖ് അബു സംവിധാനം ചെയ്യുന്ന 'നീലവെളിച്ച'ത്തിന്റെ ഫസ്റ്റ് ലുക്ക് പോസ്റ്റര്‍ പുറത്ത്. ചിത്രത്തിലെ ബഷീര്‍ എന്ന കഥാപാത്രമാണ് ഫസ്റ്റ് ലുക്കില്‍ ഉള്ളത്. ടൊവിനോയാണ് ബഷീറായി ചിത്രത്തിലെത്തുന്നത്.
ടൊവിനോയ്ക്ക് പുറമെ റിമ കല്ലിങ്കല്‍, റോഷന്‍ മാത്യു, ഷൈന്‍ ടോം ചാക്കോ, രാജേഷ് മാധവന്‍, ഉമ കെ.പി, പൂജ മോഹന്‍രാജ്, ദേവകി ഭാഗി എന്നിവരും ചിത്രത്തില്‍ പ്രധാന വേഷത്തിലെത്തുന്നു. 'നീലവെളിച്ച'ത്തിന്റെ പ്രഖ്യാപന സമയത്ത് പൃഥ്വിരാജ്, കുഞ്ചാക്കോ ബോബന്‍, സൗബിന്‍ ഷാഹിര്‍ എന്നിവരായിരുന്നു കേന്ദ്ര കഥാപാത്രങ്ങള്‍. പിന്നീട് ഡേറ്റ് പ്രശ്‌നങ്ങള്‍ മൂലം അവര്‍ സിനിമയില്‍ നിന്ന് പിന്‍മാറുകയായിരുന്നു.
എ വിന്‍സന്റിന്റെ സംവിധാനത്തില്‍ 1964ല്‍ പുറത്തിറങ്ങിയ 'ഭാര്‍ഗ്ഗവിനില'യത്തിന്റെ പുനരാവിഷ്‌കാരമാണ് 'നീലവെളിച്ചം'. മധു, പ്രംനസീര്‍, വിജയ നിര്‍മല, അടൂര്‍ ഭാസി, കുതിരവട്ടം പപ്പു തുടങ്ങിയവരായിരുന്നു 'ഭാര്‍ഗ്ഗവിനിലയ'ത്തിലെ താരങ്ങള്‍. ബഷീറിന്റെ 'നീലവെളിച്ചം' എന്ന ചെറുകഥയെ അടിസ്ഥാനമാക്കിയാണ് 'ഭാര്‍ഗ്ഗവിനിലയ'ത്തിന്റെ തിരക്കഥ എഴുതിയിരിക്കുന്നത്.
തലശേരിയിലെ പിണറായിയാണ് 'നീലവെളിച്ച'ത്തിന്റെ പ്രധാന ലൊക്കേഷന്‍. ഒപിഎം സിനിമാസാണ് ചിത്രം നിര്‍മിക്കുന്നത്. ഗിരീഷ് ഗംഗാധരന്‍ ഛായാഗ്രഹണം. ബിജിപാല്‍-റെക്‌സ് വിജയന്‍ എന്നിവരാണ് സംഗീത സംവിധാനം. എഡിറ്റര്‍-ജ്യോതിഷ് ശങ്കര്‍. ഈ വര്‍ഷം ഡിസംബറിലാണ് ചിത്രം തിയേറ്ററിലെത്തുക.