ലിജോ ജോസ് പെല്ലിശ്ശേരി സംവിധാനം ചെയ്ത് മമ്മൂട്ടി നായകനാവുന്ന 'നന്‍പകല്‍ നേരത്ത് മയക്ക'ത്തിന്റെ ടീസര്‍ റിലീസ് ചെയ്തു. ഒരു ലോക്കല്‍ ബാറില്‍ ശിവാജി ഗണേശന്റെ സിനിമ ഡയലോഗുകള്‍ അഭിനയിച്ച് കാണിക്കുന്ന മമ്മൂട്ടിയാണ് ടീസറില്‍ കാണുന്നത്. സിംഗിള്‍ ടേക്കില്‍ ചിത്രീകരിച്ചിരിക്കുന്ന സീനില്‍ ശിവാജി ഗണേശന്‍ അഭിനയിച്ച് 1973ല്‍ പുറത്തിറങ്ങിയ ഗൗരവം എന്ന സിനിമയിലെ ഡയലോഗാണ് മമ്മൂട്ടി അഭിനയിച്ച് കാണിക്കുന്നത്.
ലിജോ ജോസ് പെല്ലിശേരിയുടെ തന്നെ കഥയ്ക്ക് എസ്. ഹരീഷ് തിരക്കഥയും സംഭാഷണവും ഒരുക്കിയിരിക്കുന്നു. പേരന്‍പ്, കര്‍ണന്‍, പുഴു എന്നീ സിനിമകള്‍ക്ക് ക്യാമറ ചലിപ്പിച്ച തേനി ഈശ്വറാണ് ക്യാമറ. ഒറ്റ ഷെഡ്യൂളിലാണ് ചിത്രത്തിന്റെ ചിത്രീകരണം പൂര്‍ത്തിയാക്കിയത്.
മമ്മൂട്ടി കമ്പനിയും ആമേന്‍ മുവി മൊണാസ്ട്രിയും ചേര്‍ന്നാണ് ചിത്രം നിര്‍മ്മിക്കുന്നത്. രമ്യ പാണ്ട്യന്‍, അശോകന്‍ എന്നിവരും ചിത്രത്തില്‍ പ്രധാന വേഷം അവതരിപ്പിക്കുന്നു.