മമ്മൂട്ടിയും മഞ്ജു വാര്യരും ആദ്യമായി ഒന്നിക്കുന്ന ചിത്രമാണ് ദ പ്രീസ്റ്റ്. നവാഗതനായ ജോഫിന്‍ ടി ചാക്കോ ഒരുക്കുന്ന ചിത്രത്തിന്റെ ഷൂട്ടിങ് സെറ്റിലെത്തിയ മഞ്ജുവിന്റെ ചിത്രങ്ങള്‍ പുറത്തുവന്നു. സ്വപ്‌നം സഫലമായിരിക്കുന്നു എന്ന കുറിപ്പോടെയാണ് മമ്മൂട്ടിക്കൊപ്പമുള്ള ചിത്രം മഞ്ജു തന്റെ ഫെയ്‌സ്ബുക്ക് പേജില്‍ പങ്കുവെച്ചത്.
‘ദ ക്യു’ ഇപ്പോള്‍ ടെലഗ്രാമിലും ലഭ്യമാണ്. കൂടുതല്‍ വാര്‍ത്തകള്‍ക്കും അപ്‌ഡേറ്റുകള്‍ക്കുമായി ടെലഗ്രാം ചാനല്‍ സബ്‌സ്‌ക്രൈബ് ചെയ്യാം
ജനുവരി ഒന്നിന് ചിത്രീകരണമാരംഭിച്ച സിനിമയുടെ ഫസ്റ്റ് ലുക്ക് സര്‍പ്രൈസുകള്‍ക്കും സസ്പെന്‍സിനും വകയുണ്ടെന്ന് സൂചന നല്‍കുന്നതായിരുന്നു. ജോഫിന്‍ ടി ചാക്കോയാണ് ചിത്രത്തിന്റെ കഥയും സംവിധാനവും നിര്‍വഹിക്കുന്നത്. ദീപു പ്രദീപും, ശ്യാം മേനോനുമാണ് തിരക്കഥ. ആന്റോ ജോസഫും ബി ഉണ്ണിക്കൃഷ്ണനും വി എന്‍ ബാബുവും ചേര്‍ന്നാണ് നിര്‍മ്മാണം. അഖില്‍ ജോര്‍ജിന്റേതാണ് ക്യാമറ. ത്രില്ലര്‍ സ്വഭാവത്തിലുള്ള സിനിമയായിരിക്കും ദ പ്രീസ്റ്റ് എന്നാണ് സൂചന.
നിഖില വിമല്‍, സാനിയ ഇയ്യപ്പന്‍, ശ്രീനാഥ് ഭാസി, രമേഷ് പിഷാരടി, ജഗദീഷ്, മധുപാല്‍, ടോണി, സിന്ധു വര്‍മ്മ, ബേബി മോണിക്ക തുടങ്ങിയവരും ചിത്രത്തില്‍ പ്രധാനവേഷത്തിലെത്തുന്നുണ്ട്.