'കുരുതി'യും ആമസോണിൽ, ഓഗസ്റ്റ് 11ന് ഓണം റിലീസ്
പൃഥ്വിരാജ് ചിത്രം കുരുതി ആമസോണിൽ റിലീസ് ചെയ്യുന്നു. ഓഗസ്റ്റ് 11ന് ഓണം റിലീസായാണ് ആമസോണിൽ സിനിമ റിലീസ് ചെയ്യുന്നത്. മെയ് 13 ന് തിയറ്ററുകളിൽ റിലീസ് ചെയ്യാൻ ആയിരുന്നു നേരത്തെ തീരുമാനിച്ചിരുന്നത്. എന്നാൽ കൊറോണ വ്യാപനത്തെ തുടർന്ന് തീയറ്ററുകൾ അനിശ്ചിതമായി അടഞ്ഞു കിടക്കുന്ന സാഹചര്യത്തിലാണ് ആമസോൺ പ്രൈമിൽ റിലീസ് ചെയ്യുന്നത്.
റോഷന്‍ മാത്യുവും സിനിമയിൽ കേന്ദ്ര കഥാപാത്രത്തെ അവതരിപ്പിക്കുന്നുണ്ട്. പൊളിറ്റിക്കല്‍ ഡ്രാമ സ്വഭാവമുള്ള സിനിമ മനു വാര്യരാണ് സംവിധാനം ചെയ്തത്. പൃഥ്വിരാജ് പ്രൊഡക്ഷന്‍ ആദ്യമായി ഒറ്റക്ക് നിര്‍മ്മാണമേറ്റെടുത്ത സിനിമയാണ് കുരുതി. അഭിനന്ദന്‍ രാമാനുജമാണ് ക്യാമറ.
പകയും പ്രതികാരവും രാഷ്ട്രീയ വൈരവും സിനിമയുടെ ഇതിവൃത്തമാണെന്ന് ടീസര്‍ സൂചന നൽകിയിരുന്നു. മുരളി ഗോപി, ഷൈന്‍ ടോം ചാക്കോ, ശ്രിന്ദ,മണികണ്ഠന്‍ ആചാരി, നെസ്ലന്‍, സാഗര്‍ സൂര്യ, നവാസ് വള്ളിക്കുന്ന് തുടങ്ങിയവരും ചിത്രത്തിലുണ്ട്. റഫീക്ക് അഹമ്മദാണ് ഗാനരചന. ജേക്‌സ് ബിജോയ് സംഗീത സംവിധാനം. സുപ്രിയാ മേനോനാണ് നിര്‍മ്മാതാവ്.