'വിജയ് സൂപ്പറും പൗർണമിക്കും' ശേഷം സംവിധായകൻ ജിസ് ജോയ് ഒരുക്കുന്ന 'മോഹൻകുമാർ ഫാൻസ്' ഫസ്റ്റ്ലുക്ക് പോസ്റ്റർ പുറത്തിറങ്ങി. കുഞ്ചാക്കോ ബോബൻ കേന്ദ്ര കഥാപാത്രമായി എത്തുന്ന ചിത്രത്തിൽ പുതുമുഖം അനാർക്കലി നാസർ ആണ് നായിക.

സിദ്ധിഖ്, രൺജി പണിക്കർ, കെപിഎസി ലളിത, ശ്രീനിവാസൻ, മുകേഷ് എന്നിവരും പ്രധാന കഥാപാത്രങ്ങളായി ചിത്രത്തിലെത്തുന്നു. ബോബി-സഞ്ജയ് ആണ് കഥ. കുടുംബ ബന്ധങ്ങൾ പശ്ചാത്തലമാക്കിയുള്ള ആക്ഷേപ ഹാസ്യമായിരിക്കും ചിത്രമെന്നാണ് സൂചന. 'കെട്ട്യോളാണ് എൻറെ മാലാഖ'യ്ക്ക് ശേഷം മാജിക് ഫ്രെയിംസിൻറെ ബാനറിൽ ലിസ്റ്റിൻ സ്റ്റീഫൻ ആണ് ചിത്രം നിർമിക്കുന്നത്.

2013ൽ റിലീസ് ചെയ്ത 'ബൈസിക്കിൾ തീവ്‌സ്' ആണ് ജിസ് ആദ്യമായി സംവിധാനം ചെയ്ത ചിത്രം. 2017ൽ ആസിഫ് അലി, അപർണ്ണ ബാലമുരളി, ശ്രീനിവാസൻ എന്നിവരെ കേന്ദ്രകഥാപാത്രങ്ങളാക്കി 'സൺഡേ ഹോളിഡേ', 2019ൽ ആസിഫിനേയും ഐശ്വര്യ ലക്ഷ്മിയേയും പ്രധാന കഥാപാത്രങ്ങളാക്കി 'വിജയ് സൂപ്പറും പൗർണ്ണമിയും'. ആദ്യ മൂന്ന് ചിത്രങ്ങളിലും ആസിഫ് അലി ആയിരുന്നു നായകൻ. കുഞ്ചാക്കോയെ നായകനാക്കി ജിസ് ഒരുക്കുന്ന ആദ്യ ചിത്രം കൂടിയാണ് 'മോഹൻകുമാർ ഫാൻസ്'.