മോഹൻലാൽ - ബി. ഉണ്ണികൃഷ്ണൻ ചിത്രം 'ആറാട്ടി'ൽ കെജിഎഫ് വില്ലൻ ഗരുഡയും അഭിനേതാവായി എത്തുന്നു. 'കെജിഎഫി'ൽ റോക്കി ഭായിയുടെ പ്രതിനായക വേഷത്തിൽ എത്തിയ രാമചന്ദ്ര രാജുവിന്റെ ആദ്യ മലയാളചിത്രമായിരിക്കും 'ആറാട്ട്'. പ്രധാന വില്ലൻ വേഷമല്ലെങ്കിലും മോഹൻലാലും രാമചന്ദ്ര രാജുവുമൊത്തുള്ള മാസ് ആക്ഷൻ രംഗങ്ങൾ ചിത്രത്തിൽ പ്രതീക്ഷിക്കാം. തിരക്കഥയിൽ സുപ്രധാന പങ്കുവഹിക്കുന്ന കഥാപാത്രമായിരിക്കും താരത്തിന്റേതെന്നും റിപ്പോർട്ടുകൾ സൂചിപ്പിക്കുന്നു.
'പുലിമുരുകന്' ശേഷം ഉദയകൃഷ്ണയുടെ തിരക്കഥയിൽ മോഹൻലാൽ മാസ് ആക്ഷൻ ഹീറോയായി എത്തുന്ന ചിത്രമാണ് 'ആറാട്ട്'. നെയ്യാറ്റിൻകര ഗോപൻ എന്ന കഥാപാത്രത്തെയാണ് ചിത്രത്തിൽ മോഹൻലാൽ അവതരിപ്പിക്കുന്നത്. ശ്രദ്ധ ശ്രീനാഥാണ് ‘ആറാട്ടി'ൽ മോഹൻലാലിന്റെ നായിക. നെടുമുടി വേണു, സായ്കുമാർ, സിദ്ദിഖ്, ജോണി ആന്റണി, ഇന്ദ്രൻസ്, രാഘവൻ, നന്ദു, ബിജു പപ്പൻ, ഷീല, സ്വാസിക, മാളവിക, രചന നാരായണൻ കുട്ടി, എന്നിവരാണ് ചിത്രത്തിലെ മറ്റു കഥാപാത്രങ്ങൾ.
വിജയ് ഉലകനാഥ് ആണ് ഛായാഗ്രഹണം. ഷമീർ മുഹമ്മദ് എഡിറ്റിംഗും രാഹുൽ രാജ് സംഗീതസംവിധാനവും. ജോസഫ് നെല്ലിക്കൽ പ്രൊഡക്ഷൻ ഡിസൈനും ഷാജി നടുവിൽ ആർട്ട് ഡയറക്ഷനും. സ്റ്റെഫി സേവ്യർ ആണ് കോസ്റ്റിയൂംസ്. ബി.കെ ഹരിനാരായണൻ, രാജീവ് ഗോവിന്ദൻ, ഫെജോ, നികേഷ് ചെമ്പിലോട് എന്നിവരാണ് ഗാനരചന. 'ദൃശ്യം രണ്ടാം ഭാഗത്തിനും 'മരയ്ക്കാറി'നും ശേഷം പ്രേക്ഷകർ കാത്തിരിക്കുന്ന ചിത്രത്തിന്റെ ഷൂട്ടിങ് പാലക്കാട് പുരോഗമിക്കുകയാണ്. പാലക്കാടിന് പുറമെ ഹൈദരാബാദും ചിത്രത്തിന് ലൊക്കേഷനാകുന്നു.