സോഷ്യല് മീഡിയയില് വൈറലായ ഒരു പാകിസ്ഥാന് ക്രിക്കറ്റ് ആരാധകന്റെ മീമുണ്ടായിരുന്നു . മത്സരത്തിനിടയില് ക്യാച്ച് വിട്ട് കളഞ്ഞ ആസിഫ് അലിയെന്ന പാകിസ്ഥാന് ക്രിക്കറ്റ് താരത്തെ നിരാശയോടെ നോക്കി നില്ക്കുന്ന പാക് ആരാധകന്റെ മുഖഭാവം . ഈ ആരാധകന്റെ മുഖം മാറ്റി അവിടെ തല്ലുമാല സിനിമയില് നിന്നുള്ള കല്ല്യാണി പ്രിയദര്ശന്റെ മുഖം എഡിറ്റ് ചെയ്ത് ചേര്ത്ത പുതിയ മീമാണ് ഇപ്പോള് വൈറലാകുന്നത്. തല്ലുമാല സിനിമയുടെ കല്ല്യാണപന്തലിലെ തല്ലില് ടെവിനോയുടെ മണവാളന് വസീം എന്ന കഥാപാത്രം തല്ല് തുടങ്ങുമ്പോള് കല്ല്യാണിയുടെ കഥാപാത്രം കൊടുക്കുന്ന ഒരു എക്സപ്രഷനാണ് എഡിറ്റ് ചെയ്ത് ചേര്ത്തിരിക്കുന്നത്.
ട്വിറ്ററില് ഉണ്ണി രാജേന്ദ്രന് എന്ന അക്കൗണ്ടില് നിന്നാണ് മീം പോസ്റ്റ് ചെയ്തിരിക്കുന്നത്. മീമിന്റെ കമന്റ് സെക്ഷനില് കല്ല്യാണി പ്രിയദര്ശന് തന്നെ മറുപടിയുമായി എത്തിയിരിക്കുകയാണ്. 'നിങ്ങള് വിശ്വസിച്ചാലും ഇല്ലെങ്കിലും ഈ ഷോട്ടിനു മുന്പ് സംവിധായകന് ഖാലിദ് റഹ്മാനും എഴുത്തുകാരന് മുഹ്സിന് പരാരിയും എനിക്ക് തന്ന റഫറന്സ് ഇതേ ആളിന്റെ ഫോട്ടോ തന്നെയാണ്. ഒരു മീം കണ്ട് ഇതിന് മുന്പ് ഒരിക്കലും ഞാന് ഇത്രയും സന്തോഷിച്ചിട്ടില്ല'. എന്നാണ് കല്ല്യാണി ട്വീറ്റ് ചെയ്തത്.
ആഗസ്റ്റ് 12നാണ് തല്ലുമാല തിയേറ്ററുകളില് റിലീസായത്. ഷൈന് ടോം ചാക്കോ, ലുക്മാന് അവറാന്, അദ്രി ജോ, ബിനു പപ്പു തുടങ്ങിയവരാണ് സിനിമയിലെ മറ്റു താരങ്ങള്. ആഷിക് ഉസ്മാനാണ് ചിത്രത്തിന്റെ നിര്മ്മാണം.