കൊവിഡും ലോക്ഡൗണും മൂലം സിനിമാ ലോകം പ്രതിസന്ധിയിലായപ്പോൾ ഷൂട്ടിങ് ലൊക്കേഷനുകളിലെ തിരക്കുകളിൽ നിന്ന് മാറി വിശ്രമത്തിലാണ് താരങ്ങൾ. പലരും നേരിട്ടുളള സാമൂഹ്യ ഇടപെടലുകളിൽ നിന്നും വിട്ടുനിന്ന് മാസങ്ങളോളമായി വീടുകളിലാണ്. എങ്കിലും താരങ്ങളെല്ലാം സമൂഹമാധ്യമങ്ങിൽ എപ്പോഴും സജീവമാണ്. '8 മാസമായി ക്വാറന്റൈനിൽ, 7 മാസമായുളള തെഴിലില്ലായ്മ' എന്ന അടിക്കുറിപ്പോടെ വീട്ടിലെ വർക്ക്ഔട്ട് ചിത്രം സോഷ്യൽ മീഡിയയിൽ പോസ്റ്റ് ചെയ്തിരിക്കുകയാണ് നടൻ ജയറാം. തെഴിലില്ലായ്മ സിനിമയിൽ മാത്രമല്ല, ഞങ്ങൾക്കും അതു തന്നെയാണ് അവസ്ഥ എന്നാണ് ആരാധകരുടെ കമന്റ്.
താരത്തിന്റെ വർക്കൗട്ട്-മേക്കോവർ ചിത്രങ്ങൾ ഒന്നിനു പിറകെ മറ്റൊന്നായി സോഷ്യൽ മീഡിയയിൽ വൈറലായിരുന്നു. അടുത്തിടെ മകൻ കാളിദാസ് ജയറാം പങ്കുവെച്ച ജയറാമിന്റെ ജിം ലുക്കും ശ്രദ്ധ നേടിയിരുന്നു. അച്ഛൻ എന്നും 5 മണിക്ക് എഴുന്നേറ്റ് വ്യായാമം തുടങ്ങുമെന്നാണ് കാളിദാസ് പറഞ്ഞത്. ഈ പ്രായമാകുമ്പോൾ ഇതിന്റെ പകുതിയെങ്കിലും ആരോഗ്യത്തോടെ ഇരിക്കാനായാൽ ഭാഗ്യം എന്നായിരുന്നു ചിത്രത്തിനൊപ്പം കാളിദാസിന്റെ കുറിപ്പ്.
‘അല വൈകുണ്ഠപുരമുലൂ’ എന്ന അല്ലു അർജുനൻ ചിത്രത്തിനായി ജയറാം വർക്കൗട്ടിലൂടെ 13 കിലോയോളം ഭാരം കുറച്ചിരുന്നു. താരത്തിന്റെ മെലിഞ്ഞ ചിത്രങ്ങൾ ആയിരുന്നു അന്ന് സമൂഹമാധ്യമങ്ങളിൽ വൈറൽ. മണിരത്നം സംവിധാനം ചെയ്യുന്ന ഹിസ്റ്റോറിക്കൽ ഡ്രാമ 'പൊന്നിയൻ സെൽവൻ', വെങ്കട്ട് പ്രഭു സംവിധായകനായി എത്തുന്ന കാസിനോ ബേസ്ഡ് കോമഡി ചിത്രം 'പാർട്ടി' എന്നിവയാണ് ജയറാമിന്റെ വരാനിരിക്കുന്ന ചിത്രങ്ങൾ.