പ്രേമലുവില്‍ അമല്‍ ഡേവിസ് ആയെത്തിയ സംഗീത് പ്രതാപ് ആദ്യമായി നായകനാകുന്ന ചിത്രം ഇറ്റ്‌സ് എ മെഡിക്കല്‍ മിറാക്കിളിന്റെ ഫസ്റ്റ് ലുക്ക് പോസ്റ്റര്‍ പുറത്ത്. ഒരു ആശുപത്രിയുടെ പശ്ചാത്തലത്തില്‍ ഗ്ലാസ് ഡോറിലൂടെ നോക്കുന്ന വലിയ ചെവികളുമായി നില്‍ക്കുന്ന സംഗീതിന്റെ ചിത്രമാണ് പോസ്റ്ററിലുള്ളത്. മനുഷ്യനും കുരങ്ങും ചേര്‍ന്നതു പോലെയാണ് പോസ്റ്ററിലെ ചിത്രം. മിഡില്‍ ക്ലാസ് മെമ്പേഴ്‌സിന്റെ ബാനറില്‍ അനിരുദ്ധ് നിര്‍മ്മിക്കുന്ന ചിത്രത്തിന്റെ സംവിധാനം നിര്‍വഹിക്കുന്നത് ശ്യാമിന്‍ ഗിരീഷ് ആണ്. നിലീന്‍ സാന്ദ്രയാണ് കഥയും തിരക്കഥയും രചിച്ചത്.
കരിക്കിന്റെ സാമര്‍ത്ഥ്യശാസ്ത്രം എന്ന വെബ്‌സീരീസിന്റെ സംവിധാനവും തിരക്കഥയും ഇവര്‍ തന്നെയായിരുന്നു നിര്‍വഹിച്ചത്. കിഷ്‌കിന്ദാ കാണ്ഡം, രേഖചിത്രം എന്നീ സിനിമകള്‍ക്ക് സംഗീത സംവിധാനം നിര്‍വ്വഹിച്ച മുജീബ് മജീദാണ് ഈ ചിത്രത്തിന് വേണ്ടിയും സംഗീത സംവിധാനം കൈകാര്യം ചെയ്യുന്നത്. രോമാഞ്ചം എന്ന ബ്ലോക്ക്ബസ്റ്റര്‍ ഹിറ്റ് സിനിമയുടെ ഛായാഗ്രാഹകനായ സിനു താഹിറിന്റെയാണ് സിനിമാറ്റോഗ്രാഫി. ചമ്മന്‍ ചാക്കോയാണ് എഡിറ്റിംഗ്. ഓബ്‌സ്‌ക്യൂറ എന്റര്‍ടെയ്ന്‍മെന്റ്‌സ് ആണ് മെഡിക്കല്‍ മിറാക്കിളിന്റെ മാര്‍ക്കറ്റിംഗ് നിര്‍വ്വഹിക്കുന്നത്.