ഏറെ പ്രതീക്ഷയോടെ റിലീസിനായി കാത്തിരുന്ന സൂര്യ ചിത്രമാണ് 'സൂരറൈ പോട്ര്'. ഒക്ടോബർ 12 രാത്രി 12 മണിയ്ക്ക് ആമസോൺ പ്രൈമിലൂടെ ചിത്രം പ്രേക്ഷകരിലേയ്ക്ക് എത്തി. എന്നാൽ സിനിമയുടെ ഔദ്യോഗിക റിലീസിന് മുമ്പ് ടെലഗ്രാം ഉൾപ്പടെയുളള പൈറസി സൈറ്റുകളിലും ചിത്രമെത്തിയിരുന്നു. അടുത്തിടെ ആമസോണിൽ റിലീസ് ചെയ്ത 'പുത്തം പുതുകാലൈയ്', 'നിശബ്ദം', 'പെൻഗ്വിൻ' എന്നീ സിനിമകളും അനധികൃത വെബ്സൈറ്റുകളിലൂടെ പ്രേക്ഷകരിലേയ്ക്ക് എത്തിയിരുന്നു. ഇതിനെതിരെ ആമസോൺ നൽകിയ പരാതിയിൽ പൈറസി സൈറ്റായ തമിഴ് റോക്കേഴ്സിനെ വിലക്കുകയും ചെയ്തു. എന്നാൽ ഇത്തവണയും റിലീസിന് മുമ്പ് തന്നെ ചിത്രം ലീക്കായതിൽ പ്രതിഷേധവുമായി രംഗത്തെത്തിയിരിക്കുകയാണ് സൂര്യ ആരാധകർ.
സുധാ കൊങ്കരയാണ് 'സൂരറൈ പോട്ര്' സംവിധാനം. മാധവൻ പ്രധാന വേഷത്തിലെത്തിയ ' ഇരുതി സുട്ര് ' എന്ന ചിത്രത്തിലൂടെ ശ്രദ്ധേയയായ സംവിധായികയാണ് സുധ. എയർ ഡെക്കാൻ സ്ഥാപകൻ ക്യാപ്റ്റൻ ജി.ആർ ഗോപിനാഥിന്റെ ജീവിത കഥയെ അടിസ്ഥാനമാക്കിയാണ് ചിത്രം. വിമാന കമ്പനി സ്ഥാപിക്കാൻ അദ്ദേഹം നടത്തിയ പോരാട്ടമാണ് ചിത്രത്തിന്റെ പ്രമേയം. സൂര്യയുടെ മൂപ്പത്തിയെട്ടാമത്തെ ചിത്രമാണിത്. അപർണ ബാലമുരളിയാണ് നായിക.
ജാക്കി ഷറോഫ്, മോഹൻ ബാബു, കരുണാസ് , പരേഷ് റാവൽ, ഉർവ്വശി എന്നിവരാണ് ചിത്രത്തിലെ മറ്റ് അഭിനതാക്കൾ. നികേത് ബോമ്മി റെഡ്ഡിയാണ് ക്യാമറാ. ജി.വി പ്രകാശാണ് സംഗീതം ഒരുക്കുന്നത്. 2ഡി എന്റർടൈൻമെന്റ്സും സീഖ്യാ എന്റർടെയ്ൻമെന്റിന്റെ ബാനറിൽ ഗുനീത് മോംഘയുമാണ് ചിത്രത്തിന്റെ നിർമ്മാതാക്കൾ.