ദിലീഷ് പോത്തനും ശ്യാം പുഷ്കരനും ഫഹദ് ഫാസിലും നേതൃത്വം നൽകുന്ന ഭാവന സ്റ്റുഡിയോസ് പുതിയ ചിത്രം പ്രഖ്യാപിച്ചു. 'തണ്ണീർമത്തൻ ദിനങ്ങൾ' , 'സൂപ്പർ ശരണ്യ' എന്നീ ചിത്രങ്ങൾക്ക് ശേഷം ഗിരീഷ് എ ഡി സംവിധാനം ചെയ്യുന്ന പ്രൊജക്ടാണ് ഭാവന സ്റ്റുഡിയോസ് നിർമ്മിക്കുന്നത്. 'പാൽ തൂ ജാൻവർ', 'തങ്കം' എന്നീ പ്രൊജക്ടുകൾക്ക് ശേഷം ഈ ബാനർ നിർമ്മിക്കുന്ന സിനിമ കൂടിയാണിത്. നസ്ലിനും മമിതാ ബൈജുവുമാണ് പ്രധാന താരങ്ങൾ. 'അയാം കാതലൻ' ആണ് ഗിരീഷ് എഡിയുടെ സംവിധാനനത്തിൽ ഇനി പുറത്തിറങ്ങാനിരിക്കുന്ന ചിത്രം.
ദിലീഷ് പോത്തൻ ഫേസ്ബുക്കിൽ കുറിച്ചത്
ഭാവന സ്റ്റുഡിയോസിന്റെ ബാനറിൽ ഞാനും ശ്യാമും ഫഹദും ചേർന്ന് നിർമ്മിക്കുന്ന അഞ്ചാമത് ചിത്രം. നസ്ലിനും മമിതാ ബൈജുവും പ്രധാന വേഷത്തിൽ എത്തുന്ന ചിത്രം ഈ മാസം ചിത്രീകരണം ആരംഭിക്കുന്നതാണ് . ഇതുവരെ നിങ്ങൾ തന്ന സഹകരണം ഇനിയും പ്രതീക്ഷിക്കുന്നു .
നന്ദി
2018 -ൽ 'അള്ള് രാമേന്ദ്രൻ' എന്ന സിനിമയുടെ സഹരചയിതാവായാണ് എ.ഡി ഗിരീഷ് സിനിമാരംഗത്തെിയത്. സിനിമയിലെത്തുന്നതിന് മുമ്പ് ഗിരീഷ് എ.ഡി സംവിധാനം ചെയ്ത യശ്പാൽ, മൂക്കുത്തി, വിശുദ്ധ അംബ്രോസ് എന്നീ ഷോർട്ട് ഫിലിമുകൾ വലിയ സ്വീകാര്യത നേടിയിരുന്നു. സ്കൂൾ-കോളജ് പശ്ചാത്തലത്തിലാണ് ഗിരീഷ് എ.ഡിയുടെ ആദ്യ രണ്ട് സിനിമകളും.