തമിഴ്‌നാട്ടിലെ പ്രശസ്ത നാടന്‍ പാട്ട് കലാകാരിയും, അഭിനേത്രിയുമായ പറവൈ മുനിയമ്മ അന്തരിച്ചു. മലയാളത്തില്‍ 'പോക്കിരിരാജ' എന്ന സിനിമയില്‍ മമ്മൂട്ടിയുടെ രാജ എന്ന കഥാപാത്രത്തിന്റെ ഇന്‍ട്രോ സീന്‍ മുനിയമ്മ അവതരിപ്പിക്കുന്ന അത്തയുടെ ഡയലോഗില്‍ നിന്നാണ്. വിക്രം നായകനായ ധൂള്‍ എന്ന സിനിമയിലെ കഥാപാത്രമാണ് മുനിയമ്മക്ക് വഴിത്തിരിവായത്. പ്രായാധിക്യത്തെ തുടര്‍ന്ന് കുറച്ച് നാളായി ചികില്‍സയിലായിരുന്നു. മധുരൈയിലെ വീട്ടിലാണ് അന്ത്യം.

മധുരൈയിലെ പറവൈ ഗ്രാമത്തില്‍ നിന്ന് നാടന്‍ പാട്ടുകളിലൂടെയാണ് മുനിയമ്മ ശ്രദ്ധിക്കപ്പെടുന്നത്. വിദ്യാസാഗര്‍ ഈണമിട്ട ഗാനമാലപിച്ചാണ് മണിയമ്മ സിനിമയിലെത്തിയത്. 2003ല്‍ ധൂള്‍ എന്ന ചിത്രത്തില്‍ അഭിനയജീവിതം തുടങ്ങിയ മുനിയമ്മ അമ്പതിലേറെ സിനിമകള്‍ ചെയ്തു. 2015ല്‍ ഗുരുതരാവസ്ഥയില്‍ ആശുപത്രിയില്‍ പ്രവേശിക്കപ്പെട്ട മുനിയമ്മയ്ക്ക് ചികില്‍സാ സഹായവുമായി ധനുഷും ശിവകാര്‍ത്തികേയനും എത്തിയിരുന്നു. 2019ല്‍ തമിഴകത്തെ പ്രധാന പുരസ്‌കാരമായ കലൈലാമണി നേടിയിട്ടുണ്ട്.

കോവില്‍, ദേവതയെ കൊണ്ടേന്‍, സണ്ടൈ, തമിഴ് പടം എന്നിവയിലും മലയാളത്തില്‍ ഒരു സെക്കന്‍ഡ് ക്ലാസ് യാത്രയിലും അഭിനയിച്ചു. 2017ല്‍ സതുരൈ അടിയിലാണ് അവസാനമായി അഭിനയിച്ചത്. കലൈഞ്ജര്‍ ടിവിയില്‍ കുക്കറി ഷോയും ഇടക്ക് അവതരിപ്പിച്ചിരുന്നു.