ഇരുപതാം നൂറ്റാണ്ട് എന്ന സിനിമയില്‍ മോഹന്‍ലാലിന്റെ എവര്‍ഗ്രീന്‍ ഡയലോഗുകളില്‍ ഒന്നാണ് 'നര്‍കോടിക്‌സ് ഇസ് എ ഡര്‍ട്ടി ബിസിനസ്. പിന്നീട് പല മലയാള സിനിമകളിലും ഇത് മോഹന്‍ലാലിന്റെ ഡയലോഗ് റഫറന്‍സായി കടന്നുവന്നിരുന്നു. പൃഥ്വിരാജ് സുകുമാരന്‍ മോഹന്‍ലാലിനെ നായകനാക്കി ഒരുക്കിയ ലൂസിഫറിലും ഇത് പഞ്ച് ഡയലോഗ് ആയി.
2020ലെ മോഹന്‍ലാലിന്റെ ആദ്യ റിലീസായി എത്തുന്ന ബിഗ് ബ്രദറിലും ഈ ഡയലോഗിനും ഡ്രഗ് മാഫിയക്കും പ്രസക്തിയുണ്ടെന്ന് സൂചന നല്‍കുന്നതാണ് രണ്ടാം ടീസര്‍. മോഹന്‍ലാലിന്റെ സച്ചിദാനന്ദന്‍ എന്ന കഥാപാത്രത്തിന്റെ ആക്ഷന്‍ രംഗങ്ങള്‍ കോര്‍ത്തിണക്കിയാണ് സിദ്ദീഖ് രചനയും സംവിധാനവും നിര്‍വഹിക്കുന്ന സിനിമയുടെ ടീസര്‍ എത്തിയിരിക്കുന്നത്.
ബോളിവുഡ് സംവിധായകനും നടനുമായ അര്‍ബാസ് ഖാന്‍ മലയാളത്തിലെത്തുന്ന ചിത്രവുമാണ് ബിഗ് ബ്രദര്‍. സല്‍മാന്‍ ഖാന്‍ നായകനായ ദബാങ് ടുവിന്റെ സംവിധായകനാണ് അര്‍ബാസ് ഖാന്‍. സല്‍മാന്റെ സഹോദരനുമാണ്. സിദ്ദീഖ്, അനൂപ് മേനോന്‍, ചെമ്പന്‍ വിനോദ് ജോസ്,അനൂപ് മേനോന്‍, ഇര്‍ഷാദ് അലി എന്നിവരും സിനിമയിലുണ്ട്. ജീത്തു ദാമോദര്‍ ആണ് ഛായാഗ്രാഹകന്‍.
സിദ്ദീഖിന്റെ നേതൃത്വത്തിലുള്ള നിര്‍മ്മാണ വിതരണ കമ്പനിയായ എസ് ടാക്കീസ് വൈശാഖാ സിനിമാസും ഷമാന്‍ ഇന്റര്‍നാഷനലും ചേര്‍ന്നാണ് ഈ ബിഗ് ബജറ്റ് സിനിമ നിര്‍മ്മിക്കുന്നത്. ദീപക് ദേവ് ആണ് സംഗീത സംവിധായകന്‍.