കരിയറിലെ ഏറ്റവും വലിയ ബോക്‌സ് ഓഫീസ് വിജയവുമായി ടൊവിനോ തോമസ്. ഓഗസ്റ്റ് 12ന് തിയറ്ററുകളിലെത്തിയ ടൊവിനോ ചിത്രം തല്ലുമാല 25 ദിവസം തിയറ്ററുകള്‍ പിന്നിടുമ്പോള്‍ 71.36 കോടി നേടി. വേള്‍ഡ് വൈഡ് കളക്ഷനാണ് ഇത്. മുഹസിന്‍ പരാരിയുടെയും അഷ്‌റഫ് ഹംസയുടെയും തിരക്കഥയില്‍ ഖാലിദ് റഹ്‌മാന്‍ സംവിധാനം ചെയ്ത തല്ലുമാല സമീപകാലത്തെ ഏറ്റവും വലിയ ട്രെന്‍ഡ് സെറ്റര്‍ തീര്‍ത്താണ് വിജയം നേടിയത്. ആഷിഖ് ഉസ്മാന്‍ ആണ് നിര്‍മ്മാണം. വിഷ്ണു വിജയ് സംഗീത സംവിധാനവും ജിംഷി ഖാലിദ് ക്യാമറയും.
തല്ലുമാല റിലീസിന് മുമ്പേ മുഹസിന്‍ പരാരി-വിഷ്ണു വിജയ് ടീം ഒരുക്കിയ പാട്ടുകള്‍ ട്രന്‍ഡ് തീര്‍ത്തിരുന്നു. ടൊവിനോ തോമസ്-കല്യാണി പ്രിയദര്‍ശന്‍ കോമ്പിനേഷനിലെത്തിയ ആദ്യ ചിത്രവുമാണ് തല്ലുമാല. മണവാളന്‍ വസീം എന്ന കഥാപാത്രമായി ടൊവിനോ തോമസിന്റെ കഥാപാത്രത്തിനും കയ്യടി ലഭിച്ചു.
ടൊവിനോയുടെ രണ്ട് ഗെറ്റപ്പുകള്‍ ചിത്രത്തിലുണ്ട്. ഇരുപതുകാരനായി എത്തുന്ന ടൊവിനോയുടെ വീഡിയോ സോങ്ങ് ട്രെന്‍ഡിംഗ് ആയിരുന്നു. ദുബായിലും, തലശ്ശേരിയിലും, കണ്ണൂരിലെ പരിസരങ്ങളിലുമായിരുന്നു സിനിമയയുടെ പ്രധാന രംഗങ്ങളുടെ ചിത്രീകരണം നടന്നത്. ടൊവിനോയെയും കല്യാണിയെയും കൂടാതെ ലുക്മാന്‍, ഷൈന്‍ ടോം ചാക്കോ, ചെമ്പന്‍ വിനോദ് ജോസ്, ഗോകുലന്‍ തുടങ്ങിയവര്‍ ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നു
എഡിറ്റിംഗ് നിഷാദ് യൂസഫ്. ആര്‍ട്ട് ഗോകുല്‍ ദാസും നിര്‍വഹിച്ചിരിക്കുന്നു.