ഹോണ്ടയെ പിന്തള്ളി ഇന്ത്യയിലെ ആദ്യത്തെ ബിഎസ് 6 ഇരുചക്ര വാഹനമെന്ന ബഹുമതി ഹീറോ സ്‌പ്ലെന്‍ഡര്‍ ഐ-സ്മാര്‍ട്ട് സ്വന്തമാക്കി. റോഡ് ഗതാഗത ഹൈവേ മന്ത്രാലയത്തിന്റെ അംഗീകാരമുള്ള പരിശോധനാ സ്ഥാപനമായ ഹരിയാനയിലെ ഇന്റര്‍നാഷണല്‍ ഓട്ടോമോട്ടീവ് ടെക്‌നോളജി സെന്ററില്‍നിന്നാണ് ഹീറോയുടെ ടു വിലറിന് ടൈപ്പ് അപ്രൂവല്‍ സര്‍ട്ടിഫിക്കറ്റ് ലഭിച്ചത്.
ജയ്പുരില്‍ പ്രവര്‍ത്തിക്കുന്ന ഹീറോ മോട്ടോകോര്‍പ്പിന്റെ ഗവേഷണ കേന്ദ്രത്തിലാണ് സ്‌പ്ലെന്‍ഡര്‍ ഐ-സ്മാര്‍ട്ട് ബിഎസ് 6 പാലിക്കുന്നതിന് വേണ്ട പ്രക്രിയ നടത്തിയത്. എന്നാൽ ഈ ഐ-സ്മാര്‍ട്ട് ബിഎസ് 6 വേര്‍ഷന്‍ എപ്പോള്‍ വിപണിയിലെത്തിക്കുമെന്ന് ഹീറോ വ്യക്തമാക്കിയിട്ടില്ലെങ്കിലും ഉടൻ തന്നെ പ്രതിക്ഷിക്കാം എന്ന സൂചനയാണ് കമ്പനി വൃത്തങ്ങൾ നൽകുന്നത്.
2020 ഏപ്രില്‍ ഒന്നിനാണ് ഭാരത് സ്റ്റേജ് 6 മലിനീകരണ നിയന്ത്രണ മാനദണ്ഡങ്ങള്‍ പ്രാബല്യത്തിൽ വരുന്നത്. എന്നാൽ വളരെ നേരത്തെ തന്നെ ഹീറോ ബി എസ് 6 പാലിക്കുന്ന ആദ്യ വാഹനം പ്രഖ്യാപിച്ച് എതിരാളികളെ ഞെട്ടിച്ചിരിക്കുകയാണ്.
വരും നാളുകളിൽ ഹീറോ മോട്ടോകോര്‍പ്പ് കൂടുതല്‍ മോട്ടോര്‍സൈക്കിളുകളും സ്‌കൂട്ടറുകളും ബിഎസ് 6 പാലിക്കുന്നതാക്കി മാറ്റുമെന്നും റിപ്പോർട്ടുണ്ട്.