തമിഴ് സംഘത്തിന്റെ വില്ലേജ് കുക്കിങ് ചാനലിനൊപ്പം രാഹുൽ ഗാന്ധിയും കൂടിയപ്പോൾ ഒന്നര ദിവസം കൊണ്ട് വീഡിയോ സ്വന്തമാക്കിയത് ഏഴ് മില്യണ്‍ കാഴ്ച്ചക്കാരെ. വില്ലേജ് കുക്കിങ് ചാനൽ എന്ന പേരിലുളള പാചക യൂട്യൂബ് ചാനലിലെ ഏറ്റവും പുതിയ വീഡിയോയിൽ അപ്രതീക്ഷിതമാാണ് രാഹുൽ ഗാന്ധി എത്തിയത്. മഷ്റൂം ബിരിയാണിയാണ് രാഹുലിനായി ഷോ അവതാരകർ തയ്യാറാക്കിയത്. തമിഴ് മക്കൾക്കൊപ്പമുളള രാഹുലിന്റെ പാചക പരീക്ഷണവും, ഒരുമിച്ച് തറയിലിരുന്ന് ഭക്ഷണം കഴിക്കുന്നതുമെല്ലാം നിമിഷ നേരം കൊണ്ട് സോഷ്യൽ മീഡിയയിൽ വൈറലായി. പതിവിലും വേഗത്തിലാണ് ഏഴു മില്യൺ സബ്സ്ക്രൈബേഴ്സ് ഉള്ള ചാനലിന്റെ മഷ്‌റും ബിരിയാണി വീഡിയോ പ്രേക്ഷകരിലേയ്ക്ക് എത്തിയത്.
ഇതൊരു മഹത്തായ നിമിഷമാണെന്നും രാഹുൽ ഗാന്ധി നൽകിയ പ്രോത്സാഹനം ഞങ്ങൾക്കേറെ പ്രചോദനമാണെന്നും ചാനൽ അംഗങ്ങൾ പറയുന്നു. 'പരമ്പരാഗതവും ആരോഗ്യകരവുമായ ചേരുവകൾ ഉപയോഗിച്ച് ഞങ്ങൾ തയ്യാറാക്കിയ മഷ്റൂം ബിരിയാണിയാണ് വീഡിയോയില‍ുള്ളത്. ഞങ്ങളോടൊപ്പം ഭക്ഷണം കഴിച്ച് രാഹുൽ ഗാന്ധിയും. ജീവിതത്തിലെ ഈ അപൂർവ്വ നിമിഷം ഞങ്ങൾക്ക് ഒരിക്കലും മറക്കാനാകില്ല. ഈ അവസരം ഞങ്ങൾക്കു നേടിത്തന്ന രാഹുൽ സാറിന് നന്ദി ', വീഡിയോക്ക് ഒപ്പമുളള കുറിപ്പിൽ പറയുന്നു.
വീഡിയോയിൽ ബിരിയാണിക്കൊപ്പമുളള സാലഡ് തയ്യാറാക്കുന്നത് രാഹുൽ ആണ്. അതിനാവശ്യമായ ചേരുവകകൾ അദ്ദേഹം തന്നെ തമിഴിൽ പ്രേക്ഷകർക്ക് പരിചയപ്പെടുത്തുന്നുമുണ്ട്. വിദേശത്തെ പാചക പരിപാടികളിൽ പങ്കെടുക്കണമെന്നതാണ് തങ്ങളുടെ ആഗ്രഹമെന്ന് ചാനൽ അവതാരകർ രാഹുലിനോട് പറഞ്ഞപ്പോൾ യുഎസിലെ തന്റെ സുഹൃത്ത് വഴി അവസരം ഒരുക്കിത്തരാമെന്ന് രാഹുൽ വാക്കു നൽകി. വിദേശത്ത് മാത്രമല്ല, മറ്റു ഇന്ത്യൻ സംസ്ഥാനങ്ങളിലും നിങ്ങളുടെ പാചക ഷോ എത്തണമെന്ന് രാഹുൽ ചാനൽ അംഗങ്ങളോട് പറഞ്ഞു.