ഷാ‍ർജയില്‍ നടക്കുന്ന കുട്ടികളുടെ വായനോത്സവത്തിന് ഞായറാഴ്ച സമാപനമാകും. വിവിധ എമിറേറ്റുകളില്‍ നിന്നടക്കം നിരവധി പേരാണ് വായനോത്സവം കാണാനായി ഷാർജ എക്സ്പോ സെന്‍ററില്‍ എത്തുന്നത്. പുസ്തകങ്ങള്‍ വാങ്ങുക വായിക്കുകയെന്നതിനപ്പുറം കുട്ടികള്‍ക്കായി നിരവധി വർക്ക് ഷോപ്പുകളും പരിപാടികളുമാണ് വായനോത്സവത്തില്‍ ഒരുക്കിയിട്ടുളളത്.

വായനോത്സവത്തിന്‍റെ വെബ് സൈറ്റിലൂടെ പരിപാടികളെ കുറിച്ചുളള വിശദമായ വിവരങ്ങള്‍ അറിയാന്‍ കഴിയും. വായനോത്സവത്തിന്‍റെ കഥാപാത്രങ്ങളായ വാംഡ, ഷൂവ, ഖലം, നക്തയെന്നിവർ വിവിധ പരിപാടികളാല്‍ സന്ദർശകരെ രസിപ്പിക്കും. ടൈപ്പ് റൈറ്റർ പരിചയപ്പെടുത്തുന്ന ആർട് ഓ ടൈപ്പിംഗ് രാവിലെ 11 മണിക്കും വൈകീട്ട് 6 മണിക്കും നടക്കും. അതിഥികള്‍ കുട്ടികളുമായി സംവദിക്കാനും ഇന്ന് സമയം കണ്ടെത്തും.

കുട്ടികളുടെ ഭാവനയേയും കലാവാസനയേയും പരിപോഷിപ്പിക്കുന്ന വിവിധ പരിപാടികളും വായനോത്സവത്തില്‍ നടക്കുന്നുണ്ട്. കളിവീടുണ്ടാക്കുക, വലിയ ക്യാന്‍ വാസില്‍ ഇഷ്ടമുളള നിറമുപയോഗിച്ച് ചിത്രം വരയ്ക്കുക തുടങ്ങിയ വർക്ക് ഷോപ്പുകളിലും കുട്ടികള്‍ ആവേശത്തോടെ പങ്കെടുക്കുന്നുണ്ട്.

വായനോത്സവത്തില്‍ ഏറെ ഇഷ്ടത്തോടെയാണ് എത്തുന്നതെന്ന് കുട്ടി വീടുണ്ടാക്കിയ സന്തോഷത്തോടെ ഷാർജ അവർ ഓണ്‍ സ്കൂളിലെ വിദ്യാർത്ഥിനിയായ ഫറ പറയുന്നു. കുട്ടികളുടെ കോമിക് ക്യാരക്ടറായ ബട്ടർഫിംഗേഴ്സിന്‍റെ ശില്‍പി ഖൈയറുന്നീസയുമായുളള സംവാദ പരിപാടിയും ഇന്ന് നടക്കും.