കോഴിക്കോട് മുക്കത്ത് സ്കൂള് വിദ്യാര്ത്ഥിനിയായ ദളിത് പെണ്കുട്ടി ആത്മഹത്യ ചെയ്ത സംഭവത്തില് യുവാവ് അറസ്റ്റില്. കാരശ്ശേരി മുക്കം സ്വദേശിയായ റിനാസിനെയാണ് (22) പൊലീസ് പിടികൂടിയത്. ഇയാള്ക്ക് മേല് പൊലീസ് ആത്മഹത്യാ പ്രേരണാകുറ്റം ചത്തി. യുവാവിന്റെ മാനസിക പീഡനം കൊണ്ടാണ് മകള് ആത്മഹത്യ ചെയ്തത് എന്നാരോപിച്ച് പെണ്കുട്ടിയുടെ അമ്മ എസ്പിക്കും കളക്ടര്ക്കും പരാതി നല്കിയിരുന്നു.
കഴിഞ്ഞ ചൊവ്വാഴ്ച്ചയാണ് വിദ്യാര്ത്ഥിനിയെ സ്കൂള് യൂണിഫോമില് വീടിനുള്ളില് മരിച്ച നിലയില് കണ്ടെത്തിയത്.
മരിക്കുന്നതിന് തൊട്ടുമുമ്പുവരെ വിദ്യാര്ത്ഥിനി റിനാസിന് ഒപ്പമായിരുന്നെന്നും പെണ്കുട്ടി കടുത്ത മാനസിക പ്രയാസം അനുഭവിച്ചിരുന്നെന്നും കുടുംബം പറയുന്നു. റിനാസിന്റെ കുടുംബത്തില് നിന്ന് ഭീഷണിയുണ്ടായിരുന്നതായും ദളിത് പെണ്കുട്ടിയുടെ കുടുംബം ആരോപിക്കുന്നുണ്ട്. റിനാസിന്റെ പേര് എഴുതിയ വിദ്യാര്തഥിനിയുടെ ഡയറി പൊലീസ് കണ്ടെടുത്തിരുന്നു. പുസ്തകത്തിലും പെണ്കുട്ടിയുടെ കൈത്തണ്ടയിലും യുവാവിന്റെ പേര് എഴുതിവെച്ചിരുന്നു. ഇയാളുടെ ഫോണും പൊലീസ് പരിശോധിച്ചു വരികയാണ്. പെണ്കുട്ടിയുടെ സഹപാഠികളുടെ മൊഴിയും റിനാസിന് എതിരാണ്. ഇയാള്ക്കെതിരെ അന്വേഷണം നടത്തണമെന്നാവശ്യപ്പെട്ട് നാട്ടുകാരും പട്ടിക ജാതി ക്ഷേമസമിതിയും രംഗത്തെത്തിയിരുന്നു.
‘ദ ക്യു’ ഇപ്പോള് ടെലഗ്രാമിലും ലഭ്യമാണ്. കൂടുതല് വാര്ത്തകള്ക്കും അപ്ഡേറ്റുകള്ക്കുമായി ടെലഗ്രാം ചാനല് സബ്സ്ക്രൈബ് ചെയ്യാം