തെക്കന്‍ തമിഴ്‌നാട് തീരത്തിന് സമീപം ചക്രവാതച്ചുഴി; സംസ്ഥാനത്ത് നാല് ദിവസം അതിശക്തമായ മഴ
തെക്കന്‍ തമിഴ്‌നാട് തീരത്തിനടുത്ത് ചക്രവാതച്ചുഴി രൂപപ്പെട്ടു. ഇതുമൂലം സംസ്ഥാനത്ത് അടുത്ത നാല് ദിവസം അതിശക്തമായ മഴയ്ക്ക് സാധ്യതയുണ്ടെത്ത് കാലാവസ്ഥാ നിരീക്ഷണ കേന്ദ്രം. ഞായറാഴ്ച വരെ വ്യാപക മഴ ലഭിച്ചേക്കാം.
ഇടിമിന്നലിനും മണിക്കൂറില്‍ 40 കിലോമീറ്റര്‍ വേഗതയില്‍ കാറ്റിനും സാധ്യതയുണ്ട്. പത്തനംതിട്ട, കോട്ടയം, ഇടുക്കി ജില്ലകളില്‍ വ്യാഴാഴ്ച ഓറഞ്ച് അലര്‍ട്ട് പ്രഖ്യാപിച്ചു. ഉരുള്‍പൊട്ടല്‍, മണ്ണിടിച്ചില്‍ സാധ്യതയുള്ള മലയോര പ്രദേശങ്ങളില്‍ അതീവ ജാഗ്രത വേണമെന്നും, മത്സ്യത്തൊഴിലാളികള്‍ കടലില്‍ പോകരുതെന്നും മുന്നറിയിപ്പുണ്ട്.
തമിഴ്‌നാട് തീരത്ത് നിന്നും കാറ്റ് കേരളത്തിലേക്ക് വീശുന്നതാണ് ഇപ്പോള്‍ ലഭിക്കുന്ന മഴയ്ക്ക് കാരണം. ഇതിനിടെയാണ് തമിഴ്‌നാട് തീരത്തിനടുത്ത് ചക്രവാതച്ചുഴി രൂപപ്പെട്ടത്. ഇതിന്റെ സ്വാധീനം അടുത്ത മൂന്ന് ദിവസങ്ങളില്‍ തുടര്‍ന്നേക്കുമെന്നാണ് മുന്നറിയിപ്പ്.