ബലാത്സംഗ കേസുകളില്‍ ജാമ്യം തേടി മോന്‍സന്‍ മാവുങ്കല്‍ ഹൈക്കോടതിയെ സമീപിച്ചു. പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ ഉള്‍പ്പെടെയാണ് ജാമ്യാപേക്ഷ സമര്‍പ്പിച്ചിരിക്കുന്നത്. ബലാത്സംഗ കേസുകള്‍ കെട്ടിച്ചമച്ചതാണെന്നാണ് ജാമ്യാപേക്ഷയില്‍ മോന്‍സന്റെ വാദം.
പ്രായപൂര്‍ത്തിയാകാത്ത പെണ്‍കുട്ടിയെയും യുവതിയെയും ബലാത്സംഗം ചെയ്ത കേസുകളിലാണ് മോന്‍സന്‍ മാവുങ്കല്‍ ജാമ്യം തേടിയിരിക്കുന്നത്. വീട്ടിലെ സഹായിയായ സ്ത്രീയുടെ മകളെ പീഡിപ്പിച്ചുവെന്നാണ് കേസ്. വിദ്യാഭ്യാസ വാഗ്ദാനം നല്‍കി പീഡനത്തിനിരയാക്കിയെന്നാണ് മൊഴി. 2018 മുതല്‍ തുടര്‍ച്ചയായി പീഡിപ്പിക്കുന്നുവെന്നാണ് കുറ്റപത്രം. എറണാകുളം നോര്‍ത്ത് പോലീസാണ് പോക്‌സോ കേസ് രജിസ്റ്റര്‍ ചെയ്തിരുന്നത്.
ക്രൈംബ്രാഞ്ചാണ് കേസ് അന്വേഷിക്കുന്നത്. പുരാവസ്തു തട്ടിപ്പ് കേസില്‍ പ്രതിയാക്കുമെന്ന് ഭീഷണിപ്പെടുത്തിയാണ് പെണ്‍കുട്ടിയെ കൊണ്ട് തനിക്കെതിരെ മൊഴി നല്‍കിപ്പിച്ചതെന്നാണ് മോന്‍സണ്‍ വാദിക്കുന്നത്. മോന്‍സന്‍ കീഴ്‌ക്കോടതികളെ സമീപിച്ചിരുന്നെങ്കിലും ജാമ്യം ലഭിച്ചിരുന്നില്ല. ജാമ്യാപേക്ഷ ഹൈക്കോടതി പിന്നീട് പരിഗണിക്കും.