തിരഞ്ഞെടുപ്പ് രാഷ്ട്രീയം അവസാനിപ്പിക്കുന്നതായി മന്ത്രി ഇ.പി.ജയരാജന്. പാര്ട്ടി പറഞ്ഞാലും ഇനി ഒരു തിരഞ്ഞെടുപ്പിലും മത്സരിക്കാനില്ല. പാര്ട്ടിയെ നിലപാട് ബോധ്യപ്പെടുത്തുമെന്നും ജയരാജന് കണ്ണൂരിൽ മാധ്യമങ്ങളോട് പറഞ്ഞു. തിരഞ്ഞെടുപ്പുകളിലും ജനസേവന പ്രവര്ത്തനങ്ങളിലും ഇറങ്ങി പ്രവര്ത്തിക്കാനുള്ള ആരോഗ്യപരമായ സാധ്യതകള് കുറഞ്ഞു വരുന്നതായും അദ്ദേഹം പറഞ്ഞു.
ജയരാജൻ മാധ്യമങ്ങളോട് പറഞ്ഞത്
ഇനി താന് ഒരു തിരഞ്ഞെടുപ്പിലും മത്സരിക്കില്ല. അതിന് ആഗ്രഹിക്കുന്നില്ല. രണ്ടു ടേം അവസാനിച്ചവര് മത്സരിക്കേണ്ടതില്ലെന്നാണ് പാര്ട്ടിയുടെ തീരുമാനം. തന്റെ ടേം കഴിഞ്ഞു. ക്ഷീണിതനായ പ്രായമാണ് . പിണറായി വിജയന് പ്രത്യേക ശക്തിയും ഊര്ജവും കഴിവുമുള്ള മഹാമനുഷ്യനാണ്. അദ്ദേഹത്തിന്റെ അടുത്തെത്താന് സാധിച്ചെങ്കില് ഞാന് മഹാപുണ്യവാനായി തീരും. അദ്ദേഹം ആകാന് കഴിയുന്നില്ല എന്നതാണ് എന്റെ ദുഃഖം. ഏത് കാര്യത്തെ കുറിച്ചും പിണറായിക്ക് നിരീക്ഷണമുണ്ട്. നിശ്ചയദാര്ഢ്യമുണ്ട്
എസ്എഫ്ഐയിലൂടെയാണ് സിപിഎം കേന്ദ്ര കമ്മിറ്റി അംഗമായ ഇ.പി. ജയരാജന് പൊതുരംഗത്ത് എത്തിയത്. ഡിവൈഎഫ്ഐയുടെ പ്രഥമ അഖിലേന്ത്യാ പ്രസിഡന്റ് ആയിരുന്നു. ദീര്ഘകാലം സിപിഎം കണ്ണൂര് ജില്ല സെക്രട്ടറിയായും തൃശ്ശൂര് ജില്ലാസെക്രട്ടറിയുടെ ചുമതലയിലും പ്രവര്ത്തിച്ചു. 1991-ല് അഴിക്കോട് നിന്ന് ആദ്യമായി നിയമസഭയിലേക്ക് തിരഞ്ഞെടുക്കപ്പെട്ടു. 2011ലും 2016-ലും മട്ടന്നൂരില് നിന്നും നിയമസഭയിലേക്ക് തിരഞ്ഞെടുക്കപ്പെട്ടു.