എറണാകുളം മാര്ക്കറ്റിലെ വ്യാപാരികള്ക്ക് കൊവിഡ് സ്ഥിരീകരിച്ച സാഹചര്യത്തില് എറണാകുളം മാര്ക്കറ്റ് അടച്ചു. സെന്റ്. ഫ്രാന്സിസ് കത്തീഡ്രല് മുതല് പ്രസ്സ് ക്ലബ് റോഡ് വരെയുള്ള ഭാഗം അടച്ചിടുകയാണെന്ന് ജില്ലാ ഭരണകൂടം അറിയിച്ചു. ജില്ലാ കളക്ടര് എസ്. സുഹാസിന്റെ അധ്യക്ഷതയില് ചേര്ന്ന യോഗത്തിലാണ് തീരുമാനം.
നേരത്തെ രോഗം സ്ഥിരീകരിച്ച ഇലക്ട്രിക്കല് സ്ഥാപനത്തിലെ ജോലിക്കാരന്റെ സഹപ്രവര്ത്തകര്ക്കാണ് ഇന്ന് രോഗം സ്ഥിരീകരിച്ചത്. രോഗം സ്ഥിരീകരിച്ചവരുടെ പ്രാഥമിക സമ്പര്ക്ക പട്ടിക തയ്യാറാക്കി. ഇവര് നിരീക്ഷണത്തിലാണ്. ഇവര് ജോലി ചെയ്തിരുന്ന വ്യാപാര സ്ഥാപനങ്ങള് ആരോഗ്യ വകുപ്പിന്റെ നിര്ദേശത്തെ തുടര്ന്ന് അടച്ചു.
മാര്ക്കറ്റില് കൊവിഡ് ലക്ഷണങ്ങള് ഉള്ള എല്ലാവരുടെയും സാമ്പിളുകള് ശേഖരിക്കാനും വ്യാപാര സ്ഥാപനങ്ങളിലെ ജീവനക്കാരില് റാന്ഡം പരിശോധന നടത്താനും കളക്ടര് ആരോഗ്യ വകുപ്പ് ഉദ്യോഗസ്ഥര്ക്ക് നിര്ദേശം നല്കി. നിലവില് 26 പേരുടെ സാമ്പിള് പരിശോധിച്ചിട്ടുണ്ട്.
സാഹചര്യം ഗുരുതരമാവുന്നതിന് മുന്പ് തന്നെ അടിയന്തര നടപടികള് സ്വീകരിക്കണമെന്ന് മന്ത്രി വി. എസ് സുനില്കുമാര് നിര്ദേശം നല്കി. കണ്ടൈന്മെന്റ് സോണിന് പുറത്തുള്ള വ്യാപാര സ്ഥാപനങ്ങളില് സാമൂഹിക അകലം പാലിച്ചില്ലെങ്കില് കടകള് അടക്കേണ്ട അവസ്ഥ ഉണ്ടാകും. സ്ഥാപനങ്ങളില് ജോലിക്കെത്തുന്ന ജോലിക്കാരുടെയും കടകളില് എത്തുന്നവരുടെയും കാര്യത്തില് പ്രത്യേക ശ്രദ്ധ വേണമെന്നും മന്ത്രി വിഎസ് സുനില് കുമാര് പറഞ്ഞു.