സംസ്ഥാനത്തെ ബിവ്‌റേജ് ഔട്‌ലെറ്റുകള്‍ അടയ്ക്കാന്‍ തീരുമാനം. ഇന്ന് മുതല്‍ തുറക്കില്ല. തുറക്കേണ്ടതില്ലെന്ന് മാനേജര്‍മാരെ അറിയിച്ചു. എന്നുവരെ അടച്ചിടണമെന്ന കാര്യത്തില്‍ മന്ത്രിസഭാ യോഗം തീരുമാനിക്കും. എംഡിയാണ് തീരുമാനം അറിയിച്ചത്.
മദ്യവില്‍പനശാലകള്‍ പൂട്ടണമെന്ന് പ്രതിപക്ഷവും ഡോക്ടര്‍മാരുടെ സംഘടനയും ആവശ്യപ്പെട്ടിരുന്നു. തിരക്ക് നിയന്ത്രിക്കാന്‍ നടപടികളും നിര്‍ദേശങ്ങളും സര്‍ക്കാര്‍ മുന്നോട്ട് വെച്ചിരുന്നു. ബാറുകള്‍ അടച്ച് പൂട്ടിയിരുന്നെങ്കിലും പ്രത്യേക കൗണ്ടറുകള്‍ വഴി മദ്യവില്‍പന നടത്തുന്ന കാര്യം സര്‍ക്കാര്‍ ആലോചിച്ചിരുന്നു.
പ്രധാനമന്ത്രി നരേന്ദ്രമോദി രാജ്യത്ത് സമ്പൂര്‍ണ നിയന്ത്രണം പ്രഖ്യാപിച്ച സാഹചര്യത്തില്‍ നാളെ മുതല്‍ ജോലിക്കെത്തില്ലെന്ന് ബിവറേജസ് കോര്‍പ്പറേഷനിലെ ഐഎന്‍ടിയുസി നേതാക്കള്‍ പ്രഖ്യാപിച്ചിരുന്നു. സ്വയം അവധിയെടുക്കുമെന്ന് എക്‌സൈസ് മന്ത്രി ടിപി രാമകൃഷ്ണനെ അറിയിച്ചിരുന്നു.