'റോഡ് തടസപ്പെടുത്തി ചിത്രീകരണം'; പൃഥ്വിരാജിന്റെ 'കടുവ' ലൊക്കേഷനിലേക്ക് യൂത്ത് കോണ്‍ഗ്രസ് മാര്‍ച്ച്, ജോജുവിനെതിരെയും മുദ്രാവാക്യം
ഗതാഗത തടസമുണ്ടാക്കി ചിത്രീകരണം നടത്തിയെന്നാരോപിച്ച് പൃഥ്വിരാജ്-ഷാജികൈലാസ് ചിത്രം കടുവയുടെ ലൊക്കേഷനിലേക്ക് യൂത്ത് കോണ്‍ഗ്രസ് പ്രവര്‍ത്തകരുടെ മാര്‍ച്ച്. ഞായറാഴ്ച വൈകിട്ട് 4 മണിയോടെ കാഞ്ഞിരപ്പള്ളി ടി.ബി റോഡില്‍ കുന്നുംഭാഗം ഗവ. സ്‌കൂളിന് സമീപമായിരുന്നു സംഭവം. അരമണിക്കൂറോളം ചിത്രീകരണം തടസപ്പെട്ടിരുന്നു.
യൂത്ത് കോണ്‍ഗ്രസ് ചിറക്കടവ് മണ്ഡലം കമ്മിറ്റിയാണ് പ്രതിഷേധം നടത്തിയത്. വൈറ്റിലയില്‍ കോണ്‍ഗ്രസ് നടത്തിയ വഴിതടയല്‍ സമരത്തിനെതിരെ പ്രതികരിച്ച ജോജു ജോര്‍ജിനെതിരെ മുദ്രാവാക്യം വിളിച്ചാണ് പ്രവര്‍ത്തകര്‍ എത്തിയത്.
പൃഥ്വിരാജ്, കലാഭവന്‍ ഷാജോണ്‍, അലന്‍സിയര്‍ തുടങ്ങിയവര്‍ ഉള്‍പ്പെട്ട സ്റ്റണ്ട് സീനായിരുന്നു ചിത്രീകരിച്ചിരുന്നത്. ചിത്രീകരണം നടക്കുന്നതിനിടെ തള്ളിക്കയറാന്‍ ശ്രമിച്ച പ്രവര്‍ത്തകരെ നേതാക്കള്‍ പിന്തിരിപ്പിക്കുകയായിരുന്നു. പൊന്‍കുന്നം പൊലീസും സ്ഥലത്തെത്തിയാണ് സ്ഥിതി ശാന്തമാക്കിയത്. സിനിമയ്ക്ക് ചിത്രീകരണാനുമതിയുണ്ടെന്ന് നിര്‍മ്മാതാവ് വ്യക്തമാക്കി.