പാര്ട്ടി ഏല്പ്പിക്കുന്ന ഉത്തരവാദിത്തം ജാഗ്രതയോടെ നിറവേറ്റുമെന്ന് നിയുക്ത ആരോഗ്യ മന്ത്രി വീണ ജോര്ജ്. മന്ത്രി സഭയുടെ ഭാഗമാകുന്നത് തന്നെ വലിയ ഉത്തരവാദിത്തമാണ് . അത് കൊണ്ട് തന്നെ ജാഗ്രതയോട് കൂടി കഠിനമായി പരിശ്രമിക്കും. പത്തനംതിട്ട ജില്ലയെ സംബന്ധിച്ചിടത്തോളം ആറന്മുള മണ്ഡലത്തിനുള്ള അംഗീകാരമായി ഇതിനെ കാണുന്നു. പാര്ട്ടി ഏല്പ്പിക്കുന്ന ഉത്തരവാദിത്തങ്ങൾ വെല്ലുവിളികള് ഏറ്റെടുത്ത് കൊണ്ട് ചെയ്യുമെന്നും വീണ ജോര്ജ് പറഞ്ഞു. ഔദ്യോഗിക പ്രഖ്യാപനത്തിന് ശേഷം കൂടുതല് പ്രതികരിക്കാമെന്നും വീണ ജോര്ജ് പറഞ്ഞു.
രാജ്യാന്തര ശ്രദ്ധ നേടിയ കെ.കെ. ശൈലജ ആരോഗ്യമന്ത്രിയെന്ന നിലയില് നടത്തിയ പ്രവര്ത്തനങ്ങളുടെ തുടര്ച്ചയാണ് വീണ ജോര്ജ്ജില് വന്നുചേര്ന്നിരിക്കുന്നത്.ഡോ. ആര് ബിന്ദുവിനെയും ആരോഗ്യമന്ത്രിയായി സിപിഐഎം സെക്രട്ടറിയേറ്റ് പരിഗണിച്ചിരുന്നു. ആരോഗ്യവകുപ്പ് മന്ത്രിയായി വനിത തന്നെ വേണമെന്നും സിപിഎം തീരുമാനിച്ചിരുന്നു.
രണ്ടാം തവണ ആറന്മുളയില് നിന്ന് മികച്ച ഭൂരിപക്ഷത്തിലാണ് വീണ ജോര്ജ് നിയമസഭയിലെത്തിയത്. ആദ്യ ഊഴത്തില് നിയമസഭയിലും ആറന്മുള മണ്ഡലത്തിലും മികച്ച പ്രകടനം കാഴ്ച വച്ച ജനപ്രതിനിധി കൂടിയാണ് വീണ ജോര്ജ്ജ്.