കേരളം കലാപഭൂമി തന്നെയെന്ന് ആവർത്തിച്ച് ഉത്തർപ്രദേശ് മുഖ്യമന്ത്രി യോ​ഗി ആദിത്യനാഥ്. കേരളത്തിൽ അക്രമരാഷ്ട്രീയമാണ്. ജനങ്ങൾക്ക് ശാന്തിയും സമാധാനവുമില്ല. രാഷ്ട്രീയ കൊലപാതകങ്ങൾ ആവർത്തിക്കപ്പെടുകയാണെന്നും യോ​ഗി ആദിത്യനാഥ് പറഞ്ഞു. ഏഷ്യാനെറ്റ് ന്യൂസിനോടായിരുന്നു പ്രതികരണം.

ഉത്തർപ്രദേശിൽ കലാപവും ​​ഗുണ്ടാവിളയാട്ടവുമില്ല. ഓരോ വ്യക്തിയുടെയും ജീവന് യുപി സർക്കാർ സുരക്ഷ ഉറപ്പ് നൽകുന്നതായും ആദിത്യനാഥ് അവകാശപ്പെട്ടു.

ഉത്തർപ്രദേശ് തെരഞ്ഞെടുപ്പിന്റെ ആദ്യഘട്ട വോട്ടെടുപ്പ് ആരംഭിക്കുന്ന ദിവസം സൂക്ഷിച്ച് വോട്ട് ചെയ്തില്ലെങ്കിൽ യുപി കേരളം പോലെയാകുമെന്ന ആദിത്യനാഥിന്റെ പരാമർശം വലിയ വിവാദമായിരുന്നു. യുപി മുഖ്യമന്ത്രിക്ക് മറുപടി നൽകികൊണ്ട് മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി സതീശനും രം​ഗത്തെത്തിയിരുന്നു.

ഇതിന് പിന്നാലെ വാർത്താ ഏജൻസിയായ എ.എൻ.ഐയ്ക്ക് നൽകിയ അഭിമുഖത്തിലും ആദിത്യനാഥ് പരാമർശങ്ങൾ ആവർത്തിച്ചിരുന്നു. കേരളത്തിൽ അക്രമരാഷ്ട്രീയമാണെന്ന് പറഞ്ഞുകൊണ്ടായിരുന്നു വിമർശനം.

ഉത്തർപ്രദേശ് നിയമസഭാ തെരഞ്ഞെടുപ്പിലെ അഞ്ചാം ഘട്ട പോളി​ങ്ങ് ഇന്ന് നടക്കുകയാണ്. രാവിലെ ഏഴ് മുതൽ വൈകിട്ട് ആറുവരെയാണ് പോളിങ്ങ്.