കൊവിഡ് 19 വ്യാപന ഘട്ടം കഴിഞ്ഞാലും വീട്ടിലിരുന്ന് ജോലിയെടുക്കാമെന്ന് ജീവനക്കോട് മൈക്രോബ്ലോഗിങ് സൈറ്റായ ട്വിറ്റര്‍. സെപ്റ്റംബറിന് മുന്‍പ് ഓഫീസുകള്‍ തുറക്കാന്‍ സാധ്യതയില്ലെന്നും കമ്പനി വ്യക്തമാക്കി. കൊറോണക്കാലം കഴിഞ്ഞാലും വര്‍ക്ക് ഫ്രം ഹോം രീതി ജീവനക്കാര്‍ക്ക് തുടരാമെന്ന് പ്രഖ്യാപിച്ചതായി കമ്പനിയുടെ ഔദ്യോഗിക വക്താവാണ് അറിയിച്ചത്. എവിടെയിരുന്നും കൃത്യമായി പ്രവര്‍ത്തിക്കാമെന്ന് കഴിഞ്ഞ മാസങ്ങളില്‍ തെളിയിക്കപ്പെട്ടിട്ടുണ്ട്. ഈ സാഹചര്യത്തില്‍ തുടര്‍ന്നും വീടുകളിലിരുന്ന് തൊഴിലെടുക്കാന്‍ ആഗ്രഹിക്കുന്നവര്‍ക്ക് അത് സാധ്യമാക്കുമെന്നാണ് പ്രഖ്യാപനം.
സാന്‍ഫ്രാന്‍സിസ്‌കോയാണ് ട്വിറ്ററിന്റെ ആസ്ഥാനം. സ്ഥിതിഗതികളുടെ ഗൗരവം പരിഗണിച്ച് സാഹചര്യം അനുവദിക്കുമ്പോള്‍ ഘട്ടം ഘട്ടമായി ഓഫീസുകള്‍ തുറക്കും. മാര്‍ച്ചില്‍ ടെലി വര്‍ക്ക് രീതിയിലേക്ക് പോയ ആദ്യ സ്ഥാപനങ്ങളിലൊന്നാണ് തങ്ങളുടേത്. വികേന്ദ്രീകരണത്തിന് ഊന്നല്‍ നല്‍കി എവിടെ നിന്നും പ്രവര്‍ത്തിക്കാന്‍ പ്രാപ്തിയുള്ള തൊഴില്‍ രീതി പിന്‍തുടരാന്‍ സാധിച്ചിട്ടുണ്ടെന്നും വക്താവ് കൂട്ടിച്ചേര്‍ത്തു. ഈ വര്‍ഷാവസാനം വരെ ഭൂരിഭാഗം ജീവനക്കാര്‍ക്കും വീട്ടിലിരുന്ന് ജോലി ചെയ്യാവുന്ന സാഹചര്യം ഒരുക്കിയിട്ടുണ്ടെന്ന് ഫെയ്‌സ്ബുക്കും നേരത്തേ വ്യക്തമാക്കിയിരുന്നു. ഒരു വിഭാഗം ജീവനക്കാരൊഴികെ ബാക്കിയുള്ളവര്‍ക്ക് വര്‍ഷാവസാനം വരെ വര്‍ക്ക് ഫ്രം ഹോം രീതിയായിരിക്കുമെന്ന് ഗൂഗിളും അറിയിച്ചിട്ടുണ്ട്.