ആണ്‍കുട്ടികളും പെണ്‍കുട്ടികളും ഒരുമിച്ച് ഇരിക്കാതിരിക്കാന്‍ ബസ് കാത്തിരിപ്പ് കേന്ദ്രത്തിലെ സീറ്റ് വെട്ടിപ്പൊളിച്ചതിനെതിരെ വിദ്യാര്‍ത്ഥികളുടെ പ്രതിഷേധം. ഒരാള്‍ക്ക് മാത്രം ഇരിക്കാന്‍ കഴിയുന്ന വിധത്തിലാക്കിയ സീറ്റില്‍ ആണ്‍കുട്ടികളും പെണ്‍കുട്ടികളും ഒരുമിച്ചിരുന്നാണ് പ്രതിഷേധിച്ചത്.
തിരുവനന്തപുരം ഗവണ്‍മെന്റ് എഞ്ചിനീയറിംഗ് കോളേജിന് (സി.ഇ.ടി) സമീപമാണ് സംഭവം. ചൊവ്വാഴ്ച വൈകിട്ട് വിദ്യാര്‍ത്ഥികള്‍ ബസ് കാത്തിരിപ്പ് കേന്ദ്രത്തിയപ്പോഴാണ് ഇരിപ്പിടം വെട്ടിപ്പൊളിച്ച് ഒരാള്‍ക്ക് മാത്രം ഇരിക്കാവുന്ന രീതിയില്‍ ആക്കിയത് കാണുന്നത്. ആദ്യം സംഭവം മനസിലായില്ലെങ്കിലും ആണ്‍കുട്ടികളും പെണ്‍കുട്ടികളും അടുത്തിരിക്കുന്നത് തടയാനാണ് നാട്ടുകാര്‍ വെട്ടിപ്പൊളിച്ചതെന്ന് മനസിലായതോടെ വിദ്യാര്‍ത്ഥികള്‍ക്കിടയില്‍ പ്രതിഷേധമുയര്‍ന്നു.
കോളേജിലെ രണ്ടാം വര്‍ഷ വിദ്യാര്‍ത്ഥികള്‍ പ്രതിഷേധിച്ചുകൊണ്ട് രംഗത്തെത്തി. ഒരാള്‍ക്ക് മാത്രം ഇരിക്കാന്‍ സാധിക്കുന്ന ഇരിപ്പിടത്തില്‍ പെണ്‍കുട്ടികള്‍ ആണ്‍കുട്ടികളുടെ മടിയില്‍ കയറിയിരുന്നാണ് പ്രതിഷേധിച്ചത്. ഇതിന്റെ ചിത്രവും കുട്ടികള്‍ സോഷ്യല്‍മീഡിയയില്‍ പങ്കുവെച്ചിട്ടുണ്ട്.
അടുത്ത് ഇരിക്കരുത് എന്നല്ലേ ഉള്ളു, മടിയില്‍ ഇരിക്കാമല്ലോ അല്ലേ എന്ന കുറിപ്പോടെയാണ് പലരും ചിത്രം പങ്കുവെക്കുന്നത്. ഇതോടെ സംഭവം വലിയ രീതിയില്‍ ചര്‍ച്ചയായി. നിരവധി പേര്‍ ചിത്രം പങ്കുവെച്ച്, പിന്തുണ അറിയിച്ച് രംഗത്തെത്തുകയുമുണ്ടായി.