സാനിയ മിര്സയെ പിടി ഉഷയാക്കി ആന്ധ്ര പ്രദേശ് സര്ക്കാരിന്റെ ഫ്ളക്സ്ബോര്ഡ്. ദേശീയ കായിക ദിനാഘാഷത്തിന്റെ ഭാഗമായി സംഘടിപ്പിക്കുന്ന ചടങ്ങിനായി ഫ്ളക്സ്ബോര്ഡ് ഒരുക്കിയപ്പോഴാണ് വന് അബദ്ധം പിണഞ്ഞത്. 2014 മുതല് ദേശീയ തലത്തില് മെഡല് നേടിയ താരങ്ങളെ അഭിനന്ദിക്കുന്നതാണ് ചടങ്ങ്. ഫ്ളക്സില് സാനിയ മിര്സയുടെ ചിത്രത്തിനൊപ്പം പിടി ഉഷ എന്ന് പേര് പതിക്കുകയായിരുന്നു.
ആന്ധ്ര പ്രദേശ് മുഖ്യമന്ത്രി വൈ എസ് ജഗ്മോഹന് റെഡ്ഡിയുടെയും കായിക മന്ത്രി അവന്തി ശ്രീനിവാസിന്റെയും ചിത്രങ്ങള് സഹിതമാണ് ഫ്ളക്സ്. ചടങ്ങിന്റെ വേദിക്ക് സമീപമായിരുന്നു ഇത്തരത്തില് കൂറ്റന് ഫ്ളക്സ് സ്ഥാപിച്ചത്. ഇതോടെ ചിത്രം സമൂഹ മാധ്യമങ്ങളില് വൈറലായി. പിഴവിനെ വിമര്ശിച്ച് നിരവധി പേര് രംഗത്തെത്തി.
സാനിയയെയും പിടി ഉഷയെയും തിരിച്ചറിയാത്തവര് എങ്ങിനെ സംസ്ഥാനത്തിന്റെ കായിക രംഗം പരിപോഷിപ്പിക്കുമെന്ന് ചോദിച്ച് നിരവധി പേര് ചിത്രം തങ്ങളുടെ സമൂഹ മാധ്യമ അക്കൗണ്ടുകളില് പങ്കുവെച്ചു. പിടി ഉഷയാണോ സാനിയയാണോ മികച്ച താരമെന്ന് സംശയമുള്ളതിനാലാണ് ഇങ്ങനെയൊരു പിഴവ് സംഭവിച്ചതെന്നും ചിലര് പരിഹസിച്ചു. വ്യാഴാഴ്ച നടക്കേണ്ട ചടങ്ങ് സംഭവം വിവാദമായതോടെ മാറ്റിയിട്ടുണ്ട്.