സംസ്ഥാന സെക്രട്ടറി സ്ഥാനം ഒഴിയാന്‍ സന്നദ്ധത അറിയിച്ച് കോടിയേരി ബാലകൃഷ്ണന്‍. മുഖ്യമന്ത്രിയും പോളിറ്റ് ബ്യൂറോ അംഗവുമായ പിണറായി വിജയനെ കണ്ട് കോടിയേരി ഇക്കാര്യം ബോധിപ്പിച്ചു. സെക്രട്ടറിയേറ്റ് യോഗവും സംസ്ഥാനസമിതിയും ചേരുന്നതിന് മുന്നോടിയായി നടത്തിയ കൂടിക്കാഴ്ച്ചയ്ക്കിടെയാണ് കോടിയേരിയും മുഖ്യമന്ത്രിയും എകെജി സെന്ററില്‍ ചര്‍ച്ച നടത്തിയത്.

രാജി സന്നദ്ധത സംസ്ഥാനസെക്രട്ടേറിയറ്റലും കോടിയേരി ആവര്‍ത്തിക്കുമെന്നാണ് സൂചന. മകന്‍ ആണെന്നതും പാര്‍ട്ടിയുമായി നേരിട്ട് ബന്ധമില്ലാത്ത ആളാണെന്നതും ചൂണ്ടിക്കാട്ടി രാജിസന്നദ്ധത പരിഗണിക്കുന്നത് അവസാനത്തേയ്ക്ക് നീക്കി വെയ്ക്കാനും സാധ്യതയുണ്ട്.

മുംബൈ പൊലീസ് എത്തിയതിന് പിന്നാലെ ഫോണുകള്‍ സ്വിച്ച് ഓഫ് ചെയ്ത് ഒളിവില്‍ പോയിരിക്കുകയാണ് ബിനോയ് കോടിയേരി. കണ്ണൂരിലെ വീട്ടിലും തിരുവനന്തപുരത്ത് എകെജി സെന്ററിന്റെ സമീപത്തുള്ള ഫ്‌ളാറ്റിലേക്കുമെല്ലാം അന്വേഷണസംഘം എത്തുന്ന സാഹചര്യം സിപിഐഎം സംസ്ഥാനസെക്രട്ടറിയെ പ്രതിരോധത്തിലാക്കുന്നുണ്ട്.

ഇന്ന് സെക്രട്ടേറിയറ്റും നാളെ സംസ്ഥാനസമിതിയുമാണ് ചേരുക. തെരഞ്ഞെടുപ്പ് അവലോകനമാണ് മുഖ്യ അജണ്ടയെങ്കിലും ബിനോയ് കോടിയേരിക്കെതിരായ പരാതിയും പാര്‍ട്ടി ഭരിക്കുന്ന ആന്തൂര്‍ മുനിസിപ്പാലിറ്റിയില്‍ പ്രവാസി വ്യവസായി ആത്മഹത്യചെയ്തതിനേത്തുടര്‍ന്നുണ്ടായ വിവാദവും ചര്‍ച്ചയായേക്കും.