മാധ്യമപ്രവര്‍ത്തകന്‍ എസ്.വി.പ്രദീപിന്റെ മരണവുമായി ബന്ധപ്പെട്ട് നടക്കുന്ന നിലവിലെ അന്വേഷണത്തിനെതിരെ ഭാര്യ ശ്രീജ എസ്.നായര്‍. വാര്‍ത്തയുമായി ബന്ധപ്പെട്ട ഭീഷണി മുതല്‍ ഹണി ട്രാപ് കേസില്‍ അന്വേഷണം വേണമെന്ന ഹര്‍ജി പിന്‍വലിക്കാന്‍ വരെ വിവിധ കോണുകളില്‍ നിന്ന് സമ്മര്‍ദ്ദമുണ്ടായിരുന്നു. എന്നാല്‍ അന്വേഷണം പ്രദീപിന്റെ സ്‌കൂട്ടറിലിടിച്ച ലോറിയില്‍ മാത്രമായി ഒതുക്കിയെന്നും ശ്രീജ മനോരമ ന്യൂസിനോട് പറഞ്ഞു.
മരണവുമായി ബന്ധപ്പെട്ട് ഉയരുന്ന സംശയങ്ങള്‍ തീര്‍ക്കാന്‍ ഉന്നതതല അന്വേഷണം ആവശ്യമാണ്. അപകടത്തല്‍ ദുരൂഹതയില്ലെന്ന് പ്രാഥമിക നിഗമനത്തിലേക്ക് പൊലീസ് എത്തിയതോടെയാണ് അന്വേഷണത്തില്‍ അവിശ്വാസം പ്രകടിപ്പിച്ച് പ്രദീപിന്റെ ഭാര്യ രംഗത്തെത്തിയത്. മന്ത്രി എ.കെ.ശശീന്ദ്രന്‍ രാജിവെക്കുന്നതിനിടയാക്കിയ ഹണിട്രാപ് കേസ് സി.ബി.ഐ അന്വേഷിക്കണമെന്ന ഹര്‍ജി പിന്‍വലിക്കാന്‍ സമ്മര്‍ദ്ദമുണ്ടായിരുന്നുവെന്നും ശ്രീജ പറഞ്ഞു.