പാലാരിവട്ടം പാലം അഴിമതി കേസില്‍ മുന്‍മന്ത്രി വി.കെ ഇബ്രാഹിംകുഞ്ഞിന് ഹൈക്കോടതി ജാമ്യം അനുവദിച്ചു. കര്‍ശന ഉപാധികളോടെയാണ് ജാമ്യം. ആരോഗ്യസ്ഥിതി പരിഗണിച്ചാണ് ജാമ്യം അനുവദിക്കുന്നതെന്ന് കോടതി അറിയിച്ചു. രണ്ട് ലക്ഷം രൂപയുടെ ബോണ്ടിലാണ് ജാമ്യം.

പാസ്‌പോര്‍ട്ട് കോടതിയില്‍ കെട്ടിവെയ്ക്കണം. എറണാകുളം ജില്ല വിട്ട് പുറത്ത് പോകരുതെന്നും കോടതി നിര്‍ദേശിച്ചു. അതീവഗുരുതരമായ ആരോഗ്യ സ്ഥിതിയിലായതിനാല്‍ ജാമ്യം അനുവദിക്കണമെന്നായിരുന്നു വി.കെ ഇബ്രാഹിംകുഞ്ഞിന്റെ ഹര്‍ജി. ആരോഗ്യപ്രശ്‌നം ചൂണ്ടിക്കാണിച്ചുള്ള ജാമ്യാപേക്ഷയെ സര്‍ക്കാര്‍ എതിര്‍ത്തില്ല.

നേരത്തെ കോടതി ജാമ്യപേക്ഷ തള്ളിയിരുന്നു. ജയിലിലേക്ക് മാറ്റിയതിന് ശേഷം ജാമ്യാപേക്ഷ നല്‍കാനായിരുന്നു കോടതി നിര്‍ദേശം. ഇത് ഒഴിവാക്കണമെന്നാവശ്യപ്പെട്ട ഹൈക്കോടതിയെ സമീപിച്ചിരുന്നെങ്കിലും പരിഗണിച്ചില്ല.